Տարբեր դրվագներով ջրի երես է դուրս գալիս մեր ներքաղաքական անցյալը: Ռոբերտ Քոչարյանին ուղղված Վահան Շիրխանյանի աղմկոտ նամակը Հայաստանում բորբոքել է հանրային մեծ հետաքրքրություն ու քննարկումներ: Դրանցում նկատելիորեն գերակշռում է Ռոբերտ Քոչարյանի հանդեպ հանրային վերաբերմունքի թելադրած մթնոլորտը: Այս իրավիճակն ունի շատ ավելի խորքային շերտեր, քան այն, ինչ հիմնականում քննարկվում է, և որը խոշոր հաշվով հանրության մի զգալի մասի համար նորություն էլ չէ: Խորքային շերտում խնդիրը Հայաստանում իշխած համակարգի հարցն է ամբողջությամբ՝ դրա բոլոր դրվագներով, որ հաջորդել են իրար անկախությունից հետո:
Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Արթուր Սաքունցը, քաղաքագետ Վլադ Հովհաննիսյանը, «Մերժիր Սերժին» նախաձեռնության անդամ Դավիթ Հովհաննիսյանը:
«Ներսից փչացած լինելուն ուղղված յուրաքանչյուր քայլ ողջունելի է,- նշեց Ա. Սաքունցը:- Լավ կլինի, որ պրոցեսը շարունական լինի, և մեր 30 տարվա քաղաքական անցյալի հետ կապված ողջ ճշմարտությունը բացահայտվի, արձանագրվի»:
Իրավապաշտպանն ընդգծեց, որ ավելի շատ մտահոգիչ է այն փաստի արձանագրումը, որ ՀՀ քաղաքացիները իրենց ճակատագրի վերաբերյալ որոշումների կայացման հարցերում բացարձակ դերակատարում չեն ունեցել, քաղաքացիներն իշխանության ձևավորման պրոցեսից օտարվել են:
Ա. Սաքունցի խոսքով՝ եթե Շիրխանյանն ավելի վաղ խոսեր, հնարավոր է, որ սուտ մատնության մեղադրանքով հայտնվեր բանտում:
«Լավ է, որ այնպիսի ժամանակներում ենք ապրում, որ Շիրխանյանի նամակը քաղաքական հաշվեհարդար չի ենթադրում»,- նշեց Վ. Հովհաննիսյանը և հավելեց, որ իր դիտարկմամբ՝ Շիրխանյանի նամակում ավելի շատ խոսվում է ներպալատական ինտրիգների, միջանձնային հարաբերությունների մասին. անցյալին քաղաքական գնահատական չի տրվում:
Դ. Հովհաննիսյանի դիտարկմամբ՝ նամակում առկա հայտարարությունները երկու մասի կարելի է բաժանել՝ քաղաքական հայտարարություններ և իրավական հետևանքներ առաջացնող հայտարարություններ, որոնք նոր հիմք կարող են համարվել քննություն սկսելու համար:
Քննարկման մասնակիցներն ընդգծեցին, որ իշխանությունը քաղաքական գնահատական պետք է տա նախկին՝ ավտորիտար համակարգին:
Մանրամասն՝ տեսանյութում:
