ՀՔԱ Վանաձորի գրասենյակը գրեթե 25 տարի է, ինչ զբաղվում է մարդու իրավունքների պաշտպանությամբ։ Կազմակերպության թիրախ են հանդիսանում նաև պատերազմական հանացագործությունների արդյունքում տուժած անձինք, այդ թվում՝ խաղաղ բնակիչները։
2022 թ․ սեպտեմբերի 13-15-ին Ադրբեջանի Հանրապետության կողմից ՀՀ ինքնիշխան տարածքի նկատմամբ սանձազերծած պատերազմի հետքերով կազմակերպության իրավաբանները ՀՀ 3 մարզերի 5 համայնքներում իրականացրել են փաստահավաք առաքելություն, որի շրջանակներում վկայություններ են հավաքել մարդու իրավունքների խախտումների դեպքերով, արդյունքում՝ 14 գանգատ ներկայացնելով Մարդու իրավունքների եվրոպական դատարան՝ սեփականության իրավունքի և անձնական և ընտանեկան կյանքը հարգելու իրավունքի խախտման հիմքով։
Պատերազմի օրերին և դրան հաջորդած ժամանակահատվածում կազմակերպության կողմից ՄԻԵԴ-ում իրականացվել է գերիների և հավանական գերիների ընտանիքների անդամների պաշտպանություն։Մասնավորապես Դատարանի կանոնագրքի 39-րդ հոդվածի շրջանակներում 4 հրատապ միջոց կիրառելու մասին գանգատ է ներկայացվել դատարան, որոնցից Ադրբեջանը որպես գերի հաստատել է միայն 1 դիմումով ներկայացված զինծառայողի, ով հետագայում վերադարձվել է ՀՀ։
