Հելսինկյան քաղաքացիական ասամբլեայի Վանաձորի գրասենյակ

Իրավապաշտպան Արթուր Սաքունցը կարծում է, որ այսօր Ռոբերտ Քոչարյանը ազդեցություն ունի իր գործը քննող դատավոր Արմեն Դանիելյանի վրա:

«Ռոբերտ Քոչարյանը շատ ուշագրավ հայտարարություն արեց, որ հենց ինքն է անձամբ նշանակել այսօր իր գործը քննող դատավորին եւ ինքը հանդես էր գալիս, որպես նշանակող նախագահի դիրքում, այնպես, ինչպես ժամանակին նշանակել է, նաեւ այդպես էլ վերաբերվում է, թեկուզ հանդես է գալիս բոլորովին այլ կարգավիճակով: Եւ այն մարդկանց խումբը, որը դատարանի մուտքի մոտ է,  դե բնականաբար պետք է ամեն ջանքեր գործադրի իր շահերի պաշտպանության եւ իր աջակցության համար: Այստեղ շատ հետաքրքիր է, որ օգտագործվում են այն մեթոդները, ինչպիսի մեթոդներ ժամանակին օգտագործվում էր վերատադրվելու համար կամ իր ընտրությունների ժամանակ: Այսինքն՝ ընտրակաշառքներ, մարդկանց ներգրավվում եւ այլն, բայց ոչ թե գաղափարական աջակիցներ, մենք չենք տեսնում այդ գաղափարական աջակիցներին»,-«Ա1+»-ին ասաց Արթուր Սաքունցը:

Քոչարյանի ընդդիմախոսները, որոնք զուգահեռ ակցիաներ են անում դատարանի բակում, տարբերվում են նրա աջակիցներից, քանի որ նրանց ստիպողաբար կամ այլ միջոցներով ոչ ոք դատարանի բակ չի բերում, կարծում է իրավապաշտպանը:

«Զարմանալի չպետք է լինի լարվածությունը, բայց այստեղ մյուս հարցը վերաբերվում է նաեւ ոստիկանությանը: Ոստիկանությունը կարողանո՞ւմ է արդյոք իրավիճակում, որում ինքը չի գտնվել, գործի ժողովրդավարական պետության համարժեք, սկզբունքներին համապատասխան: Հստակ է, որ ոստիկանությունը ցույց է տալիս, որ ինքը դեռեւս գտնվում է այդ նախկին գործելակերպի շրջանակում եւ ինքը կարողություններ չունի: Չէր էլ կարող ունենալ շատ կարճ ժամանակում, սա նշանակում է, որ ոստիկանությունն էլ պետք է շատ կտրուկ բարեփոխումների ենթարկվի»,-նշեց Հելսինկայն Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը:

a1plus.am