Մահացած Ջուլիետա Ղուկասյանի դստեր ներկայացուցիչ փաստաբան Արայիկ Զալյանը այսպես էր հիմնավորել իրենց բողոքը․ - «Սույն քրեական գործով մեղադրյալը իր կալանքը պետք է կրի ազատությունից զրկվածներին պահելու Հայաստանի Հանրապետության համապատասխան քրեակատարողական հիմնարկում, որպիսի պայմաններում միայն հնարավոր կլինի պնդել Հայաստանի Հանրապետության քրեական դատավարության 17-րդ հոդվածով սահմանված լրիվ օբյեկտիվ և բազմակողմանի քննության առկայության մասին»:
Փաստաբանը հրապարակեց նաև տուժողի իրավահաջորդներին ուղղված՝ Մարդու իրավունքների պաշտպան Արման Թաթոյանի պատասխան գրությունը: Փաստաբանները օմբուդսմենին խնդրել էին ռուսական ռազմաբազա այցելել և ծանոթանալ դաժան ծեծի հետևանքով 57-ամյա կնոջը մահվան հասցնելու մեջ մեղադրվող ռուս զինծառայողի պահման պայմաններին:
«Ստացել ենք պաշտպանից պատասխան, որ տվյալ հարցը պետք է քննարկվի, և նա միանգամից չի կարող այցելել ռազմաբազա: Այսինքն դա նշանակում է, որ նույնիսկ Հայաստանի Հանրապետության մարդու իրավունքների պաշտպանի համար անհասանելի է ռազմաբազան: Եվ ես կարող եմ կասկածել՝ պետք է լինի պատիժը իրակա՞ն․․․ Այս պայմաններում մենք գտնում ենք, որ պատիժն իրական չի», - ասաց Զալյանը:
Դատախազության ներկայացուցիչ Միրհան Մարտիրոսյանը պնդեց, որ ռուս զինծառայողին բազայում պահելը իրավաչափ է, բխում է հայ-ռուսական միջպետական պայմանագրից:
Մարտիրոսյանը հատարարեց․ - «Մեղադրյալը ձերբակալվել է Ռուսաստանի Դաշնության 102-րդ բազայի տարածքում: Այսինքն բազայի տարածքից նրան դուրս բերելը արդեն իսկ հակասում է Ռուսաստանի Դաշնության օրենսդրությանը: Խոսքն այն մասին է, որ համաձայնագրի հիման վրա համատեղ իրականացվել է գործողություն: Ձերբակալումն իրականացվել է մեր իրավասու մարմնի կողմից, սակայն քանի որ հանձնումը, դուրս բերումը արդեն կհակասեր Ռուսաստանի Դաշնության օրենսդրությանը և ունենք մենք համաձայնագրի 8-րդ հոդված․․․ ի՞նչ է նշանակում համատեղ, համատեղ ձերբակալեցինք, սակայն պահում են իրենք: Այստեղ խնդիր օրենսդրության հետ Հայաստանի Հանրապետության չեմ տեսնում»:
Դատական նիստին ներկա էր նաև Ջուլիետա Ղուկսայանի դուստրը՝ Անահիտ Ղուկասյանը: Մորը կորցրած կինը կարևորեց արդար դատաքննության իրականացումը․ - «Որ Ռուսաստանը մեր վրա չխնդա: Մենք հային կըրնանք դատենք, բայց Հայաստանը ռուսին չի կըրնա․․․ Քրիստոսի տանջանք տալով սպանել է: Իմ խնդրանքս էդ է»:
Տուժողի իրավահաջորդի մյուս ներկայացուցիչ Արթուր Սաքունցը պնդում է, որ ըստ էության չի կատարվում դատարանի կայացրած որոշումը, որով Անդրեյ Ռազգիլդեևի նկատմամբ խափանման միջոց ընտրվել է կալանքը․ - «Չպետք է էնպիսի տպավորություն ստեղծվի, որ ռուսական բազան հանդիսանա Հայաստանի Հանրապետության քաղաքացու դեմ հանցագործություն կատարած անձի պահման վայր: Կամ ռուսական բազան հանդիսանա հովանավորը Հայաստանի Հանրապետության քաղաքացու նկատմամբ հանցագործություն կատարած զինծառայողի: Այդպիսի տպավորություն չպետք է ստեղծվի: Եթե նման տպավորություն ստեղծվում է, սա արդեն լուրջ խնդիր է, որի հետ կապված անելիք ունեն Հայաստանի Հանրապետության օրվա իշխանությունները: Ինձ համար առնվազն ցավալի է, որ դատական իշխանությունը հերթական անգամ չի պահպանում Հայաստանի Հանրապետության օրենսդրությամբ և Սահմանադրությամբ ամրագրված նորմերը»:
Սաքունցը պնդեց, որ իրենց պահանջը օրինական է և բխում է ՀՀ օրենսդրության ու Սահմանադրության պահանջներից։
Դատարանի որոշումը ստանալուց հետո այն կբողոքարկեն վերաքննիչ ատյանում: Բուն քրեական գործով նախաքննությունը դեռ շարունակվում է:
Leave a Reply