Հելսինկյան քաղաքացիական ասամբլեայի Վանաձորի գրասենյակ

«Առանց վեթինգի չենք ունենալու այնպիսի դատարան, որը հասարակության վստահությունը վայելի». Սաքունց

Կոշտ է նաև քաղհասարակության արձագանքը իշխանության իրականացրած դատաիրավական բարեփոխումների գործընթացին։

«Ձախողում», - մեկ բառով այսպես է նկարագրում վիճակը իրավապաշտպան Արթուր Սաքունցը՝ շեշտելով բավական ժամանակ կար ոչ թե արդարացումներ փնտրելու, այլ՝ խորքային, համակարգային վեթինգի մեխանիզմներ մշակելու, դրանց իրականացման համար անհրաժեշտ սահմանադրական փոփոխություններ իրականացնելու համար։

«Չի կարող սուպերվարչապետական Սահմանադրությունը հեղափոխական օրակարգում գտնվող խնդիրների լուծման հնարավորություն ստեղծի: Բայց ավելի վատ, նման պատճառաբանությունը հիմա ներկայացնելը համարում եմ որպես խորը վիրավորանք, ցինիզմ Հայաստանի Հանրապետության քաղաքացիների նկատմամբ: Պետք չէր մեզ պատճառաբանություն ներկայացնել, պետք էր գործողություններ կատարել՝ փոխելու այն բոլոր խոչընդոտները, որոնք անհրաժեշտ էին անցումային վեթինգի իրականացման համար», - ասաց Սաքունցը:

Առանց անցումային վեթինգի որևէ որակական փոփոխություն դատական համակարգում կատարել հնարավոր չէ, կարծում է իրավապշտպանը՝ ընդգծելով՝ կառավարության ներկայացրածը, այդ թվում՝ աշխատավարձերի բարձրացումը, արմատական փոփոխության գործիքներ չեն։

Ի վերջո, Սաքունցի խոսքով՝ «էլի կանգնելու ենք նույն կոտրած տաշտակի առաջ՝ չենք ունենալու այնպիսի դատարան, որը հասարակության վստահությունը վայելի»։

«Աշխատավարձի բարձրացում անել դատավորներին, որոնք շարունակելու են մնալ դատական համակարգում, որոնք ուղղակի մասնակից են մարդու իրավունքների կոպիտ խախտումների մեջ, իհարկե, դա չի կարող ընդունվել: Շատ շուտով իշխանությունը կառերեսվի այդ դժգոհությունների հետ», - նշեց իրավապաշտպանը: