Հելսինկյան քաղաքացիական ասամբլեայի Վանաձորի գրասենյակ

«Մենք պետք է վերջապես ձևակերպենք, որ նախորդ կառավարման համակարգին, անպատժելիության մթնոլորտին պետք է տրվի քաղաքական ու իրավաբանական գնահատականներ, ոչ թե բարիկադների մասին խոսք գնա: Պետք է հասկանանք, թե ով չի կարող լինել կառավարությունում»,- հոկտեմբերի 18-ին կայացած մամուլի ասուլիսի ժամանակ ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ խոսելով հեղափոխությունից հետո կադրային քաղաքականության մասին:

Նրա խոսքերով՝ առավել քան հասկանալի է, որ «անցումային արդարադատության» բուն էությունը նախորդ համակարգի օրոք մարդու իրավունքները խախտելու մեջ մեղադրվողներին պատասխանատվության ենթարկելն է:

«Հունան Պողոսյանի նման կադրային նշանակումներից զերծ մնալու համար անցումային քաղաքականություն պետք է իրականացնել և´ իրավական, և´ քաղաքական դաշտում»,- ասաց Սաքունցը:

Անդրադառնալով վարչապետի «քաղաքական ռասիզմ» արտահայտությանը, Սաքունցն ընդգծեց, որ այն Հունան Պողոսյանի նկատմամբ ընդհանրապես կիրառելի չէ և քաղաքական հայացքների տակ չի կարելի աչքաթող անել հանցագործությունները, որ արվում են քաղաքացիների նկատմամբ:

Արթուր Սաքունցը նաև նկատեց, որ նույն օրինաչափությամբ պետք է դիտարկել նաև մյուս բոլոր նշանակվածներին, քանի որ նրանցից շատերը քաղաքականության մեջ են եղել նախորդ համակարգի օրոք:

«Այսօր հասարակությունը պետք է շարունակի բողոքի ձայն բարձրացնել, քանի դեռ խնդիրը լուծված չէ, և մենք պետք է վստահ լինենք, երաշխիք ունենանք, որ նման նշանակումները շարունակական չեն լինի»,- նշեց Սաքունցը:

shantnews.am