Feedback

(Armenian) Գյումրեցի կնոջը ծեծելով մահվան հասցնելու մեջ մեղադրվող ռուս զինծառայողը չի ընդունում մեղադրանքը

February 5, 2020

Julieta Ghukasyan | Multimedia

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Գյումրեցի Ջուլիետա Ղուկասյանի դաժան ծեծից ու մահից ավելի քան մեկ տարի անց` այսօր, տեղի ունեցավ մեղադրյալ, Գյումրիում տեղակայված ռուսական ռազմաբազայի զինծառայող Անդրեյ Ռազգիլդեևի գործով դատական առաջին նիստը՝ նրա բացակայությամբ: Նիստը թեև կայացավ, բայց կարճ ժամանակ անց կրկին՝ արդեն 5-րդ անգամ հետաձգվեց:

 

Ռուսական կողմը հրաժարվել էր այսօր Ռազգիլդեևին բազայի տարածքից դուրս բերել: Ռազմաբազայի ներկայացուցիչ Ալեքսանդր Գլադիշևն իր հետ հրամանատար Մարտինյուկի գրությունն էր բերել, որով միջնորդում էին դատական նիստը հետաձգել՝ պահանջելով Հայաստանի իշխանություններից Ռազգիլդեևի և նրան ուղեկցողների համար տեղաշարժի անվտանգության գրավոր երաշխիքներ. «Մինչ օրս նշված գրավոր երաշխիքները Ռուսաստանի Դաշնության պաշտպանության նախարարությունը չի ստացել, դրանք ստանալուց հետո հարգելի դատարանը կտեղեկացվի սահմանված կարգով»:

 

Դատավոր Ադրինե Ղուկասյանը հետաքրքրվեց Գլադիշևից, թե ինչ երաշխիքների մասին է խոսքը:

 

«Քանի որ այս գործը բավականին աղմկահարույց է, և մեր զինծառայողի ցանկացած տեղափոխում Հայաստանի տարածքում մտավախություն է առաջ բերում, այս հարցը բարձրացվել է ՌԴ պաշտպանության նախարարության կողմից: Մինչ օրս մենք սպասում ենք թույլտվության ղեկավար կազմից նրան Հայաստանի տարածքում տեղաշարժելու համար», - պատասխանեց Գլադիշևը:

 

Արդյոք կա՞ն փաստեր կամ տեղեկություններ Ռազգիլդեևի անվտանգության հետ կապված: «Ոչ, քանի որ նա 14 ամիս գտնվում է զորամասի տարածքում՝ փաստացի կալանավորների պահման խցում, 14 ամիսների ընթացքում որևէ մտավախություն չի եղել», - հավելեց ռազմաբազայի ներկայացուցիչը:

 

«Ազատության» հարցին ի պատասխան` Գլադիշևն ասաց՝ իրեն չէ, բայց գուցե ղեկավարներին է հայտնի ինչ-որ բան:

 

57-ամյա Ջուլիետա Ղուկասյանը դաժան ծեծի էր ենթարկվել 2018-ի դեկտեմբերին՝ վաղ առավոտյան աշխատանքի գնալիս, մահացել էր հիվանդանոցում՝ ստացած ծանր վնասվածքներից: Նրա դստեր ներկայացուցիչ Արայիկ Զալյանն անվտանգության երաշխիքների պահանջի մասին իր գնահատականը տվեց ու միջնորդեց դատարանին հաջորդ նիստին բերման ենթարկել Ռազգիլդեևին:

 

«Հայաստանի Հանրապետության քրեական դատավարության օրենսգրքի նորմից չի բխում, այսինքն՝ մենք ունենք փաստ, որ Ռազգիլդեևն անհիմն պատճառով չի ներկայացել դատարան», - հայտարարեց նա:

 

Ջուլիետա Ղուկասյանի դուստրը՝ Անահիտ Ղուկասյանն էլ պահանջեց՝ ի վերջո դատարան բերել մեղադրյալին, որ տեսնեն, թե նա ով է. - «Ռուսին բերեք, վերջը տեսնինք, թե ինչ կեղնի էս տունտունիկը: Ծնող եմ կորցրել, հավի ձագ չէր»:



Դատարանը լսելով կողմերին նիստը մոտ մեկ ամսով հետաձգեց՝ ռուսական կողմից ճշտելով, թե որքան ժամանակ կպահանջվի մեղադրյալին բազայի տարածքից դուրս բերելու թույլտվություն ստանալու համար: Ալեքսանդր Գլադիշևն ասաց, որ չգիտի, բայց կարող է միջնորդել, որ այն արագացվի:

 

Տուժողի իրավահաջորդի մյուս ներկայացուցիչը՝ իրավապաշտպան Արթուր Սաքունցը, ռուսական կողմի անվտանգության երաշխիքներ պահանջելու վերաբերյալ նշեց. - «Ռուսական բազայի հրամանատարի գրությունը բացառիկ արհամարհական վերաբերմունք է Հայաստանի Հանրապետության ինքնիշխանության նկատմամբ, երկրորդ՝ դա բացարձակ արհամարհական վերաբերմունք է դատական իշխանության նկատմամբ և թքած ունենալ արդարադատության և Հայաստանի Հանրապետության նկատմամբ: Ռուսական բազայի հրամանատարի այդ գրությունը նաև ցույց է տալիս, որ ռուսական բազան, ռուսական կողմը խոչընդոտում է արդարադատության իրականացմանը ՀՀ-ում»:

 

Ռազգիլդեևվի շահերի պաշտպան Նարինե Ռշտունին ռուսական կողմի ներկայացված գրության մասին իմացել էր դատական նիստի ժամանակ: «Ազատությունը» հետաքրքրվեց՝ հանդիպե՞լ է իր վստահորդի հետ և ինչպես նրան կբնութագրի:

 

«Ես հիմա չեմ բնութագրելու, ես միայն կարող եմ ասել, որ իրեն մեղավոր չի ճանաչում, մնացածը ամբողջը դուք արդեն կկարողանաք ինքնուրույն տեսնել դատաքննության ընթացքում», - հայտնեց նա:

 

Ի դեպ, Ռշտունին տեղեկացրեց, որ Հայաստանի և Ռուսաստանի օմբուդսմենները հանդիպել են Ռազգիլդեևի հետ:

 

views: 391

Leave a Reply

Your email address will not be published. Required fields are marked *

Feedback

Select the relevant connection

  • Font size
    A A A
  • Font
    arial verdana tahoma
  • Thickness
    regular light bold
  • Spacing
    1px 2px 3px
  • Color scheme
    Black on a white background White on a black background
  • Background color
  • Text color