Helsinki Citizens' Assembly-Vanadzor

(Armenian) «Իմ կալանավորումից 11 ամիս անց ինձ պայմանական վաղաժամկետ ազատ արձակեցին` ի շնորհիվ Հելսինկյան Քաղաքացիական Ասամբլեայի Վանաձորի գրասենյակի փաստաբանների անաչառ աշխատանքի»

October 31, 2018

Media about us

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Սասնա ծռեր»-ի իրադարձություների ժամանակ անազատության մեջ հայտնված 35-ամյա Գագիկը պատմում է, թե ինչպես իր մեջ ուժ գտավ իր իրավունքները պաշտպանելու և սեփական ազատությունը վերանվաճելու համար:
 
«Կյանքումս առաջին անգամ զրկվեցի ազատությունից 2016թ. և 11 ամիս մնացի բանտում:
 
2016 թ. հուլիսին «Սասնա ծռեր»-ը գրավել էին Ոստիկանության ՊՊԾ գունդը, որից հետո Խորենացի փողոցում ծավալվող քաղաքացիական պայքարին միացել էի նաև ես: Ինձ երբեք ցույցերին բերման չեն ենթարկել: «Սասնա ծռերի» իրադարձություններին մասնակցելուց հետո, ինձ պարզապես կանչել էին Ոստիկանության բաժանմունք, որտեղ ներկայանալուց հետո, դատարանը որոշում է կայացնում կալանավորել ինձ ՀՀ Քրեական օրենսգրքի 225-րդ հոդվածի 2-րդ մասով` ոստիկաններին հարվածելու, զանգվածային անկարգություններին մասնակցելու հիմքով:
 
Ի սկզբանե սա համարել եմ սարքված գործ: Սկզբում նույնիսկ չէի հասկանում ինչ է կատարվում, ինչի համար են ինձ փակել, քանի որ ոստիկանները մինչ դատարան ինձ տանելը, հավաստիացնում էին, որ ես ուսուցիչ եմ, տան միակ կերակրողը, նորածին երեխա ունեմ, ապրիլյան պատերազմի կամավոր մասնակից եմ, ուստի` ինձ չեն կալանավորի, առավելագույնը 3 օր կպահեն: Բայց եղավ ճիշտ հակառակը:
 
Առաջին մի քանի օրը չէի հասկանում ինչ է կատարվում, հետո ինձ սկսեցի համոզել, որ այդ 25 քառակուսի մետրի մեջ եմ ապրելու: Դժվար էր ամբողջ կյանքում լինել ազատ ու հանկարծ հայտնվել չորս պատերի մեջ: Առաջին 8 ամիսը ընդհանրապես տեսակցություններն ինձ հետ արգելված էր: Իմ կալանքից հետո նորածին աղջիկս մեկ շաբաթ ջերմություն է ունեցել, մենք շատ կապված էինք միմյանց հետ, տան միակ պահողը ես էի:
 
Ինձ վրա 46 տուժող էին գրել, որոնցից մեկը իմ կուրսեցին էր, ում հետ 5 տարի սովորել եմ ու հիմա ոստիկան է աշխատում:
Իմ կալանավորումից 11 ամիս անց ինձ պայմանական վաղաժամկետ ազատ արձակեցին` ի շնորհիվ Հելսինկյան Քաղաքացիական Ասամբլեայի Վանաձորի գրասենյակի փաստաբանների անաչառ աշխատանքի: Հիմա ազատության մեջ եմ, բայց միևնույն է այս դեպքից հետո, երբեք էլ չեմ վստահի ոստիկաններին, ոչ էլ դատարաններին: Վստահությունը նրանց նկատմամբ իսպառ վերացել է, քանի որ ինձ բացահայտ խաբեցին, անմեղ տեղը բանտ նստացրեցին: Ոստիկանները չեն փոխվել, պարզապես իշխանությունն է փոխվել, որը նրանց հրաման չի տալիս բռնություն կիրառելու, եթե գա նախկին իշխանությունը, ոստիկանները նույն վարքագիծը կդրսևորեն, կրկին բռնությունների կդիմեն, մարդկանց ապօրինի կկալանավորեն: Նրանք դեռ ոստիկան չեն դառել, նույն «խորհրդային միլիցան» են:
 
Ամենամեծ խնդիրը Հայաստանում արդարադատության և օրենքի գերկայության բացակայությունն է:
 
Ես մշտապես մասնակցել եմ ցույցերի և ակտիվ արտահայտել իմ քաղաքացիական դիրքորոշումը: Պայքարել եմ մեր երկրում բարեփոխումների, աղքատությունը վերացման համար: Մենք ընտանիքով էինք միշտ մասնակցում ցույցերին, ու ես երբեք ոչ մի կուսակցության անդամ չեմ եղել: Կարծում եմ հատկապես պատմության ուսուցիչը պետք է լինի ապաքաղաքական։
 
Ազատ արձակվելուց հետո կրկին աշխատում եմ ավագ դպրոցում` որպես պատմության ուսուցիչ: Նույն դպրոցի տնօրենը ինձ հետ ընդունեց աշխատանքի: Միակ խնդիրը, որին բախվում են, այն է, որ դատվածության համար չեն ընդունում աշխատանքի պետական կառույցներում:
 
Այսօր ինձ համար ամենաթանկ արժեքը իմ աղջիկն է: Եթե նրան կարողացա պաշտպանել, կկարողանամ պաշտպանել նաև հայրենիքս, Սահմանադրությունը, օրենքը: Նրան պաշտպանելուց է բխում ինձ համար մյուս բոլոր արժեքների պաշտպանությունը»:
 
views: 1434

Leave a Reply

Your email address will not be published. Required fields are marked *

Feedback

Select the relevant connection

  • Font size
    A A A
  • Font
    arial verdana tahoma
  • Thickness
    regular light bold
  • Spacing
    1px 2px 3px
  • Color scheme
    Black on a white background White on a black background
  • Background color
  • Text color