Հելսինկյան քաղաքացիական ասամբլեայի Վանաձորի գրասենյակ

«Եվրասիական տնտեսական միության անդամ երկրների (ԵԱՏՄ) քաղաքացիների համար օդային ճանապարհով Ռուսաստան մուտք գործելու սահմանափակումները սեպտեմբերի 21-ից հանվել են, բացառությամբ Հայաստանի քաղաքացիների։ Ռուսաստանի իշխանությունները փոխադարձ հիմքի վրա հաստատել են Բելառուսի, Ղազախստանի, Ղրղզստանի քաղաքացիների համար Ռուսաստան մուտքի սահմանափակումների չեղարկումը, որոնք գործում էին կորոնավիրուսի համաճարակի պատճառով»,- այս մասին հայտնել է ՌԴ կառավարության մամուլի ծառայությունը։

Ինչո՞ւ է Մոսկվան ԵՏՄ անդամ երկրներից միայն Հայաստանի քաղաքացիներին զրկել իր տարածք մուտք գործելուց, ո՞րն էր Մոսկվայի նման որոշման պատճառը:

Այս հարցերի շուրջ ԳԱԼԱ-ն զրուցել է իրավապաշտպան Արթուր Սաքունցի հետ:

Արթուր Սաքունցի կարծիքով՝ Ռուսաստանի կողմից նման խտրական որոշման պատճառն այն է, որ ի տարբերություն ԵԱՏՄ մյուս անդամ պետությունների, Հայաստանում եղել է թավշյա հեղափոխություն, և դա լուրջ մարտահրավեր է իրենց իշխանության համար:

«Հայաստանում թավշյա հեղափոխությունը, ժողովրդի կողմից ավտորիտար կառավարում իրականացնող իշխանության հեռացումը, բնականաբար, շատ վատ պետք է ընդունվի Կրեմլի կողմից, որը մենք տեսնում ենք Բելառուսի դեպքում: Կրեմլը ակնհայտ աջակցում է Լուկաշենկոյին, ինչպես ժամանակին բացահայտ աջակցում էր թե՛ Ռոբերտ Քոչարյանին, թե՛ Սերժ Սարգսյանին: Կրեմլի գործիքակազմը ագրեսիվ պետության գործիքակազմ է: Մի բան կարող եմ հիշեցնել, որ նման թռիչքի արգելք Ռուսաստանը կիրառել է նաև Վրաստանի նկատմամբ (վրաց-ռուսական պատերազմից հետո): Ռուսաստանը, ըստ էության, իր այդ որոշմամբ հավասարեցնում է իր մոտեցումը երկու պետությունների նկատմամբ՝ Վրաստանի և Հայաստանի նկատմամբ»,- ընդգծեց իրավապաշտպանը:

Սաքունցի կարծիքով՝ թե ինչպիսի անդրադարձ կունենա Ռուսաստանի այս որոշումը հայ-ռուսական հարաբերությունների վրա, կախված է նրանից, թե ինչ դիրքորոշում կորդեգրի Հայաստանի իշխանությունը: «Եթե Հայաստանի իշխանությունը տեղի տա Ռուսաստանի այդ ճնշումներին, ապա կստացվի, որ Ռուսաստանը հասավ իր նպատակին, իսկ եթե Հայաստանը շրջանցի և զարգացնի իր արտաքին հաղորդակցության այլ ուղիները և ոչ միայն հաղորդակցման ուղիները, այլ նաև հարաբերություններրը՝ տնտեսական, կոմունիկացիաները, ապա որևիցե նշանակություն չի ունենա Հայաստանի համար»,- եզրափակեց Արթուր Սաքունցը:

galatv.am