Այսօր՝ 2018թ. նոյեմբերի 27-ին, ՀՀ Վարչական դատարանը շարունակեց քննել Լ. Ա.-ի հայցը՝ ընդդեմ ՀՀ Կառավարության՝ ՀՀ Կրթության և գիտության նախարարության կրթության տեսչական մարմնի ռիսկի գնահատման, ստուգումների պլանավորման, վերլուծությունների և գնահատման վարչության գլխավոր մասնագետի թափուր պաշտոնը զբաղեցնելու համար մրցույթ անցկացնող մրցույթային հանձնաժողովի 2018թ. հունիսի 14-ի որոշումն անվավեր ճանաչելու մասին:
Լ. Ա.-ն 2018թ. հունիսի 14-ին մասնակցել է մրցույթի հարցազրույցի փուլին և հավաքել անհրաժեշտ 75 %-ից ավելի միավոր, սակայն մրցութային հանձնաժողովը գնահատել է 60 միավոր, և դրանով Լ. Ա.-ն հարցազրույցի փուլը չի հաղթահարել:
Լ. Ա.-ն մրցութային հանձնաժողովի որոշումը բողոքարկել է ՀՀ Քաղաքացիական ծառայության խորհուրդ, սակայն որոշումն անփոփոխ է մնացել:
Մրցութային հանձնաժողովի՝ 2018թ. հունիսի 14-ի որոշումն անվավեր ճանաչելու պահանջով Լ. Ա.-ն Հելսինկյան քաղաքացիական ասամբլեայի Վանաձորի գրասենյակի աջակցությամբ 2018թ. օգոստոսի 15-ին դիմել է ՀՀ Վարչական դատարան:
Այսօր դատարանում ՀՔԱ Վանաձորի գրասենյակի Երևանի ներկայացուցչության իրավաբաններ Էմմա Շահինյանն ու Մարիամ Կարապետյանը ներգրավվեցին որպես հայցվորի ներկայացուցիչներ:
Դատարանը պատասխանող ՀՀ Կառավարության ներկայացուցչին տրամադրեց 5 աշխատանքային օր՝ ՀՀ Կրթության և գիտության նախարարության կրթության տեսչական մարմնի ռիսկի գնահատման, ստուգումների պլանավորման, վերլուծությունների և գնահատման վարչության գլխավոր մասնագետի թափուր պաշտոնը զբաղեցնելու համար մրցութային հանձնաժողովի՝ քննությունների անցկացմանը վերաբերելի բոլոր փաստաթղթերը և ձայնագրությունները դատարան ներկայացնելու համար:
Հաջորդ դատական նիստի մասին դատարանը կծանուցի:
