Քաղաքացիական հասարակության 30-ից ավելի ներկայացուցիչներ Հայաստանի վերընտրված իշխանություններին ուղերձ են հղել՝ Հայաստանի առաջնահերթ մարտահրավերների հետ կապված: Ուղերձում 10 թիրախ կա՝ անվտանգությունից մինչև տեղական ինքնակառավարման կատարելագործման խնդիրներ, որտեղ ամփոփված են թե՛ պատերազմից հետո առաջ եկած, թե՛ նախկինում եղած մարտահրավերներ:
Լևոն Բարսեղյան (Գյումրիի ժուռնալիստների «Ասպարեզ» ակումբի խորհրդի նախագահ) – Եթե անցած 3 տարիների ընթացքում իշխանությունները դրսևորեին առավել վճռականություն, իմաստություն և այդ խնդիրների մեծ մասը փորձեին լուծել, գուցե դրանք այստեղ տեղ չգտնեին՝ ապօրինի ակտիվների վերադարձ, վեթինգ, քաղաքական գնահատականի պահանջ և այլն:
Քաղհասարակության ուղերձի բովանդակությունը կախված չէ իշխանության ով լինելուց, վստահեցրեց Բարսեղյանն ու հավելեց, որ գործող իշխանությունը նաև իր կառավարմանը պետք է ինքնագնահատական տա: Ստեփան Գրիգորյանն էլ, համաձայնելով գործընկերոջ հետ, խոսեց անվտանգային խնդիրների ու իրենց մատնանշած ելքերի մասին: Առաջարկներից մեկը սահմանների դեմարկացիայի հարցն Արցախի կարգավիճակի հետ կապելն է: Հայաստան-Ադրբեջան սահմանային բնակչության անվտանգության պայմանների համար էլ առաջարկում են դիմել եվրոպական կառույցներին:
Ստեփան Գրիգորյան (Գլոբալիզացիայի և տարածաշրջանային համագործակցության վերլուծական կենտրոնի նախագահ) – ՄԱԿ-ի Անվտանգության խորհուրդ և ԵԱՀԿ, դիմել այս երկու միջազգային ամենահզոր կառույցներին, որ իրենք ուղարկեն տարածաշրջան մշտադիտարկման առաքելություն, որ ուսումնասիրեն իրավիճակը հայ-ադրբեջանական սահմաններում ու եզրակացություն անեն, նրանք զսպող մեխանիզմ կլինեն Ադրբեջանի համար, որ չհատի Հայաստանի տարածքային ամբողջականությունը:
«Իրավունքների պաշտպանություն առանց սահմանների» ՀԿ նախագահ Արաքս Մելքոնյանը խոսեց Սահմանադրության փոփոխության անհրաժեշտությունից: Նրա գնահատմամբ՝ այս տարիները ցույց են տվել գործադիրի գերիշխանություն օրենսդիրի նկատմամբ՝ անկախ այն հանգամանքից, որ երկրում խորհրդարանական կառավարում է:
Արաքս Մելքոնյան («Իրավունքների պաշտպանություն առանց սահմանների» ՀԿ նախագահ) – Հաջորդ խնդրահարույց հարցը իրավապահ համակարգի, ուժային կառույցների նկատմամբ խորհրդարանական վերահսկողության բացակայությունն է: Ե՛վ ոստիկանության, և՛ պաշտպանության ոլորտի, գլխավոր շտաբի, ԱԱԾ-ի նկատմամբ վերահսկողության խնդիրները:
Քաղհասարակությունն առնվազն 25 տարի լուրջ փորձ է կուտակել և նախկին իշխանությունների ժամանակ էլ տարբեր ուղերձներ է հղել, հիշեցրեց Արթուր Սաքունցը: Նա խնդիրների լուծման հիմքում տեսնում է մարդու և միջազգային իրավունքի գերակայությունը: Սաքունցը շեշտեց՝ այս պահին իրենք խոսում ենք իշխանության պարտավորությունների շրջանակի մասին:
Արթուր Սաքունց (Հելսինկյան քաղաքացիական ասամբլեայի Վանաձորի գրասենյակի նախագահ) – Մենք չենք կարող բավարարվել իշխանության բարի ցանկություններով, այլ պետք է հստակ պարտավորությունների ցանկ լինի, իսկ դրա համար այս իշխանությունն ունի առաջին կարևոր պարտավորությունը՝ հրապարակավ ներկայացնել, թե, ըստ իրեն, ինչը չի հաջողվել ու ինչու չի հաջողվել:
Քաղհասարակությունը պահանջատեր է լինելու, ինչն արտահայտվելու է իշխանության ներկայացուցիչների հետ հանդիպումներով, ինչու ոչ՝ նաև դատական գործընթացներով, հայտարարեցին քաղհասարակության ներկայացուցիչները:
