Մեդիա կենտրոնի «Քսենոֆոբիան՝ Ադրբեջանում․ գեներացվող ատելություն» թեմայով կազմակերպած քննարկման բանախոսներն էին ՀՔԱ Վանաձորի գրասենյակի նախագահ Արթուր Սաքունցը, ՀՀ Մարդու իրավունքների պաշտպանի օգնական Տաթևիկ Մանուկյանը, «Transparency International» ՀԿ-ի գործադիր տնօրեն Սոնա Այվազյանը, ՀՔԱ Վանաձորի գրասենյակի նախագահ Արթուր Սաքունցը։
Հայաստանի և Արցախի՝ մարդու իրավունքներով զբաղվող հասարակական կազմակերպությունները հրապարակել են «Քսենոֆոբիան՝ Ադրբեջանում» զեկույցը, որտեղ ներկայացվում է Ադրբեջանի Հանրապետությունում էթնիկ հայ բնակչության նկատմամբ գեներացվող ատելությունն ու անհանդուրժողականությունը, ինչը գոյաբանական լուրջ վտանգներ է ստեղծում Արցախի բնակչության համար։
Զեկույցի մեջ ներառված են ոչ միայն 44-օրյա պատերազմի դրսևորումները՝ սպանությունները, խոշտանգումները, քաղաքացիական կառույցների և ենթակառույցների թիրախավորումները, այլ նաև դրանց՝ որպես ատելության դրսևորման օրինակները՝ ըստ էթնիկ պատկանելիության։
Ըստ ՀՔԱ Վանաձորի գրասենյակի նախագահ Ա․ Սաքունցի՝ Ադրբեջանի իշխանությունների կողմից բարձր մակարդակով խրախուսվող՝ ըստ էթնիկ պատկանելիության թշնամանքը և ատելությունը ձևավորվել են տարիների ընթացքում․ և չնայած Ադրբեջանը, հանդիսպանալով մի շարք միջազգային կառույցների անդամ, ունի պարտավորություններ՝ մարդու իրավունքների բնագավառում, այնուամենայնիվ դրսևորում է այդ կառույցների սկզբունքները խախտող վարքագիծ և մնում անպատիժ։
Սաքունցի խոսքերով․ «Պատերազմը հանդիսացավ Ադրբեջանի իշխանությունների կողմից էթնիկ ատելության շարունակական, անպատիժ, հետևողական քաղաքականության արդյունք»։
Նա վերահաստատեց այն միտքը, որ ատելության խոսքի վրա հիմնված պետությունները դատապարտված են կործանման, և որ միայն իրավունքի գերակայությունը և ժողովրդավարության սկզբունքներով առաջնորդվելն է երաշխավորում վստահության մթնոլորտի ձևավորումը առաջին հերթին պետության ներսում՝ իր քաղաքացու մոտ, և ապա միջազգային հարթակում։
Զեկույցը հասանելի է ԱՅՍՏԵՂ
Քննարկման ամբողջական տարբերակը՝ տեսանյութում։
