0 8000 12 11

Մարդու իրավունքների պաշտպանության անվճար թեժ գիծ
menu
slide1
Կարողությունների զարգացում

Լրագրող Նարինե Ավետիսյանի գործով հարցաքննված վկայի ցուցունքներում էական հակասություններ կային

October 3, 2018

Գործունեություն | Իրավական աջակցություն | Իրավական աջակցություն | Նարինե Ավետիսյան | Նորություններ | Ռազմավարական գործեր

2018 թ. հոկտեմբերի 2-ին Լոռու մարզի ընդհանուր իրավասության դատարանում շարունակվեց Լոռի հեռուստաընկերության գլխավոր խմբագիր Նարինե Ավետիսյանի լրագրողական մասնագիտական գործունեությունը խոչընդոտելու գործի քննությունը:

 

Հիշեցնենք՝ դեպքը տեղի է ունեցել 2017 թ. սեպտեմբերի 28-ին Վանաձոր քաղաքի Սուրբ Աստվածածին եկեղեցու հարակից կամրջի վրա, երբ Նարինե Ավետիսյանը փորձել է նկարահանել հորդառատ անձրևի տակ իրականացվող ասֆալտապատման աշխատանքները:

 

 

ՀՀ Քրեական օրենսգրքի 164 հոդվածի 1-ին մասով նախատեսված արարք կատարելու համար (Լրագրողի մասնագիտական օրինական գործունեությանը խոչընդոտելը) մեղադրանք է առաջադրվել Շինպլյուս ընկերության տնօրեն Տիգրան Նազարյանին ու նույն ընկերության աշխատակից Վրեժ Խաչատրյանին:

 

Նարինե Ավետիսյանի իրավունքների պաշտպանությունն ստանձնել է Հելսինկյան քաղաքացիական ասամբլեայի Վանաձորի գրասենյակը, Կազմակերպության նախագահ Արթուր Սաքունցն ու փաստաբան Սյուզաննա Սողոմոնյանը դատարանում նրա ներկայացուցիչներն են:

 

 

Երեկ կայացած դատական նիստի ընթացքում հարցաքննվեց Նարինե Ավետիսյանն ու վկա, Շինպլյուս ընկերության աշխատակից Յուրիկ Գասպարյանը:

 

Մինչ նրանց հարցաքննելը դատարանը դահլիճից դուրս հրավիրեց լրագրող Էդ. Արզումանյանին, քանի որ վերջինս նաև գործով դատակոչված վկա է և դեռևս չի հարցաքննվել:

 

Իր ցուցմունքում Նարինե Ավետիսյանը ներկայացրեց դեպքի մանրամասները: Նշեց, որ Հայկական ժամանակի լրագրող Էդ. Արզումանյանից տեղեկանալով, որ հորդառատ անձրևի տակ ասֆալտապատման աշխատանքներ են իրականացվում, շտապել է դեպքի վայր և փորձել իր հեռախոսով նկարահանում անել, բայց նրա աշխատանքը խոչընդոտվել է: Նարինե Ավետիսյանը շեշտեց, որ մի քանի անգամ ներկայացել է, որ լրագրող է և ունեցել է այդ մասին փաստող վկայական, սակայն իր նկատմամբ բռնություն գործադրող անձինք ուշադրություն չեն դարձրել դրան և նախ հայհոյախառն արտահայտություններով պահանջել են հեռանալ, ապա բռնությամբ խլել են նրա հեռախոսը, իրեն ընկած թողել փողոցում ու հեռացել:

 

Դատարանն ու կողմերը հարցեր ուղղեցին տուժողի ցուցմունքի վերաբերյալ. նրանց հարցերին ի պատասխան՝ Նարինե Ավետիսյանը ավելի մանրամասն ներկայացրեց որոշ դրվագներ:

 

Տուժողի նախաքննական ցուցմունքը հրապարակելու անհրաժեշտություն կողմերը չտեսան:

 

Հաջորդը հարցաքննվեց վկա Յուրիկ Գասպարյանը: Նա նախ հայտարարեց, որ գրեթե ոչինչ չի հիշում այդ օրվանից, ապա կցկտուր ներկայացրեց դեպքի վերաբերյալ իր ունեցած տեղեկությունները: Պատասխանեց նաև կողմերի ու դատարանի հարցերին: Ինչից պարզ դարձավ, որ որոշ դրվագների վերաբերյալ ակնհայտ հակասություններ կան նախաքննական ցուցմունքի ու դատարանում տրված ցուցմունքի միջև: Կողմերի պահանջով հրապարակվեց նախաքննական ցուցմունքը, ապա՝ տուժողի հետ առերես հարցաքննության ընթացքում տված ցուցմունքը: Պարզվեց, որ հակասություններ կան նաև այդ երկուսի միջև:

 

 

Հարցերի միջոցով դատարանն ու կողմերը փորձեցին ճշտել, թե դրանցից որն է վկան հավաստի համարում:

 

Ցուցմունքները լսելուց հետո դատարանը քննարկեց պաշտպանական կողմի ներկայացրած դիմումն այն մասին, որ ամբաստանյալ Տիգրան Նազարյանը 2018թ. հոկտեմբերի 7-11-ը գործնական այց է ունենալու Իտալիա: Տուժող կողմն ու մեղադրող դատախազը դատարան ներկայացված փաստաթղթերին ծանոթանալուց հետո հայտարարեցին, որ դրանց Տիգրան Նազարյանի անունով հրավեր կցված չէ, հետևաբար՝ դիմումը չի կարող բավարարվել: Դատարանը համակարծիք էր և մերժեց դիմումը:

 

 

Այսքանով դատական նիստն ավարտվեց: Հաջորդ նիստը նշանակվեց 2018թ. նոյեմբերի 2-ին՝ ժամը 14:30-ին: Դատարանը կշարունակի լսել գործով անցնող վկաներին:

 

Դիտումներ՝ 180

Leave a Reply

Your email address will not be published. Required fields are marked *

Հետադարձ կապ

Ընտրել համապատասխան կապը

  • Տառաչափ
    A A A
  • Տառատեսակ
    arial verdana tahoma
  • Հաստություն
    regular light bold
  • Հեռավորություն
    1px 2px 3px
  • Գունային սխեմա
    Սևով սպիտակի վրա Սպիտակով սևի վրա
  • Ֆոնի գույնը
  • Տեքստի գույնը