Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Հայաստանում հուլիսի 13-ին ձերբակալվել է Ռուսաստանի իրավապահ մարմիների կողմից հետախուզման մեջ գտնվող ՌԴ քաղաքացի Նատալյա Տ.-ն: Այս մասին Factor.am-ին հայտնում են ՆԳՆ նախարարությունից։ Գերատեսչության փոխանցմամբ՝ ձերբակալությունն իրականացվել է հուլիսի 13-ին, ժամը 6.30-ին, Երևան-Տիվատ չվերթի ինքնաթիռի ժամանումից հետո։ 

Նատալյա Տ.-ն, ըստ ՀՀ ՆԳՆ-ի, հուլիսի 1-ից ՌԴ Մոսկվայի մարզի իրավապահ մարմինների կողմից հետախուզվում էր ՌԴ քրեական օրենսգրքի 207.3-րդ հոդվածի 2-րդ մասի (Ակնհայտ սուտ տեղեկատվության տարածումը) մեղադրանքով:

Meduza-ի փոխանցմամբ՝ Նատալյա Տ.-ն 65 տարեկան է, ռուսաց լեզվի և գրականության ուսուցչուհի է։ Ըստ աղբյուրի քրեական հետապնդման պատճառ է դարձել այն, որ ուսուցչուհին «Բարության դաս» դասաժամի ընթացքում դպրոցականներին պատմել է Բուչայում ռուսական բանակի հանցագործությունների մասին, մի քանի տեսանյութ ցուցադրել ուկրաինական լրատվամիջոցներից և Ռուսաստանի ներխուժումն Ուկրաինա անվանել միջազգային իրավունքի խախտում։ Դասն անցկացվել է 2022 թվականին։

Հայաստանի իրավապահները ռուս ուսուցչուհուն մի քանի ժամ բաժնում պահելուց հետո բաց են թողել՝ Հայաստանից չհեռանալու պահանջով, խափանման միջոց է ընտրվել երկրից չբացակայելու մասին ստորագրությունը։ ՆԳՆ-ն փոխանցում է, որ ՌԴ քաղաքացուն հայտնաբերելու մասին հայտնվել է ՌԴ իրավապահներին։

Նատալյա Տ.-ին ձերբակալելու մասին ահազանգ է ստացել Հելսինկյան քաղաքացիական ասամբլեայի Վանաձորի գրասենյակը։ Factor.am-ի հետ զրույցում իրավապաշտպան կազմակերպության փաստաբան Անի Չատինյանն ընդգծեց, որ ՌԴ քաղաքացու հետ կապված գործընթացների համաձայնեցումը Ռուսաստանի հետ անընդունելի է։

«Ձերբակալվածի աղջիկն է մեզ զանգահարել, հայտնել, որ օդանավակայանում ձերբակալվել է, քանի որ առկա է հետախուզում։ Ոստիկանությունը բաց է թողել կնոջը, քանի որ ՀՀ-ում ազատազրկելու իրավական հիմքեր չկան, բայց սահմանը հատելու սահմանափակում կա, քանի որ ՌԴ-ում կա քրեական գործ և փոխօգնության պայմանագրի շրջանակներում Հայաստանը չի թողնում երկրից դուրս գալ այն մարդկանց, որոնք որ ունեն խնդիր ՌԴ-ում։

Ինչ մնում է այն հանգամանքին, որ ՌԴ-ին տեղեկատվություն է փոխանցվում անձին հայտնաբերելու մասին՝ հետագա գործողությունները Ռուսաստանից ճշտելու համար, սա համարում ենք անօրինական, որովհետև ՀՀ-ն չպետք է կատարի ոչ ժողովրդավար երկրների պահանջները»,-ասաց Չատինյանը։

Հիշեցնենք՝ 2023 թվականին էլ Հայաստանում տեղակայված 102-րդ ռազմաբազայի զինծառայողները ՀՀ-ում ձերբակալել և ՌԴ էին տեղափոխել Դմիտրի Սեդրակովին։ Նարեկ Կիրակոսյան

Ամբողջական հոդվածը կարող եք կարդալ այս հասցեով՝ https://factor.am/792663.html

© factor.am