Հելսինկյան քաղաքացիական ասամբլեայի Վանաձորի գրասենյակ

Երեկ, 2025 թվականի մարտի 30-ին Գյումրու համայնքի ավագանու արտահերթ ընտրությունների թեկնածու Վարդան Ղուկասյանը մամուլի ասուլիսի ընթացքում հանդես է եկել կանանց նկատմամբ խտրական եւ անընդունելի արտահայտություններով, որն է` «... Հետո, այս աղջիկները կթողնե՞ն, որ մարդ մեղք չգործի՝ գեղեցիկ հագած, ոտքերը բաց... ես չգիտեմ ինչ... Ինչ ասես, անում են, տղամարդկանց գայթակղության պատճառ են դառնում։ Դրա համար էլ ասված է՝ «վայ ձեր կանանց, որ տղամարդկության գայթակղության պատճառ են դառնում»:

Կանանց իրավունքների պաշտպանությամբ զբաղվող կազմակերպությունները խստորեն դատապարտում են ցանկացած ատելության խոսք եւ խտրական տարրեր պարունակող հանրային հայտարարություններն ու խոսույթները։

Կանանց նկատմամբ նմանատիպ արտահայտությունները ոչ միայն խախտում են էթիկայի տարրական նորմերը, այլեւ հակասում են ՀՀ Սահմանադրությամբ ամրագրված մի շարք դրույթները, ինչպիսիք են՝ 3-րդ, 77-րդ եւ 29-րդ հոդվածները, ինչպես նաեւ մի շարք մարդու իրավունքների ներպետական եւ միջազգային սկզբունքները։

Կարծում ենք, որ քաղաքական գործչի կողմից հանրայնորեն հայհոյանքները, բռնարար վարքագիծն ու խտրական վերաբերմունքը խրախուսելը ոչ միայն կասկածի տակ է դնում քաղաքացուն՝ որպես բարձրագույն արժեք ընկալելը, այլեւ վտանգ է ստեղծում իրավունքների լիարժեք իրացման համար: Այսօրինակ մոտեցումները կարող են նպաստել հասարակական եւ իրավական կարգուկանոնի բացակայությանը ու նպաստել քրեական ենթամշակույթի խորացմանը։

Յուրաքանչյուր հասարակական-քաղաքական գործիչ պետք է գիտակցի իր կողմից արված ցանկացած հայտարարության ազդեցությունը եւ չնպաստի գենդերայինխտրականության, ատելության խոսքի եւ/կամ խտրականության խորացմանը, ինչպես նաեւ, պետք է նպաստի հավասարության եւ փոխըմբռնման ամրապնդմանը։

Նկատում ենք, որ այն միակ դեպքը չէ, ուստի, կոչ ենք անում՝ բացառել խտրական արտահայտություններն ու խոսույթները։

Հասարակությունը պետք է մերժի եւ չլեգիտիմացնի կանանց նկատմամբ ատելության խոսքը՝ նպաստելով արդար եւ ներառական միջավայրի ստեղծմանը։

Հայտարարությանը միանում են՝
«Կանանց ռեսուրսային կենտրոն» ՀԿ
«Սեռական բռնության ճգնաժամային կենտրոն» ՀԿ

«Հելսինկյան քաղաքացիական ասամբլեայի Վանաձորի գրասենյակ

«Սոսե կանանց հիմնահարցեր» ՀԿ
«Սպիտակի Հելսինկյան խումբ» ՀԿ
«Կանանց Կենտրոն. Շուշի» ՀԿ
«Փինք» իրավապաշտպան ՀԿ
«Իրավունքի ուժ» ՀԿ
«Կանանց աջակցման կենտրոն» ՀԿ
«Ընտանիք առանց բռնության» ՀԿ
«Իրական Աշխարհ, Իրական Մարդիկ» ՀԿ
«Ուղղակի Ժողովրդավարություն» ՀԿ
«Երիտասարդ ավանգարդ» ՀԿ
«Հանուն Իրավահավասարության Իրավապաշտպան» ՀԿ
«Կանանց հզորացման ռեսուրսային կենտրոն» ՀԿ
«Թալին-Հույս» սոցիալական ՀԿ
«Մարտունու կանանց համայնքային խորհուրդ» ՀԿ