The Economist Intelligence Unit-ը հրապարակել է Ժողովրդավարության համաթիվը, որը գնահատում է աշխարհում երկրների ժողովրդավարության մակարդակը:
Համաթիվը կազմելիս հաշվի են առնվում մի շարք ցուցանիշներ՝ ընտրություններ և պլյուրալիզմ, իշխանությունների գործունեություն, քաղաքական մշակույթ, քաղաքացիական ազատություններ, բնակչության ազդեցություն քաղաքականության վրա:
Երկրները բաժանվել են 4 խմբի՝ լիարժեք ժողովրդավարություն, թերի ժողովրդավարություն, հիբրիդ ռեժիմ և ավտորիտար ռեժիմ: Հայաստանը ցանկում 86-րդն է և ներառված է հիբրիդ ռեժիմով երկրների շարքում: Հայաստանի հարևաններից Վրաստանը 89-րդն է, Ադրբեջանը՝ 146-րդը: Հայաստանը 2018 թվականի ինդեքսում 103-րդն էր, 2017 թվականին՝ 111-րդը, 2016 թվականին՝ 120-րդը: Հայաստանը ամենաբարձր միավոր ստացել է ընտրությունների և պլյուրալիզմի ցուցանիշով, ամենացածրը՝ քաղաքական մշակույթի: Հայաստանը ներկայացվում է նկատելի առաջընթաց արձանագրած երկրների շարքում: Նշվում է, որ հիբրիդ ռեժիմով երկու երկրներ՝ Հայաստանն ու Ուկրաինան, առարկայական քայլեր են արել ժողովրդավարության ուղղությամբ: Երկու երկրներում անցկացված ընտրությունները գնահատվել են ազատ և արդար:
Ամենաժողովրդավարական երկրներն են Նորվեգիան, Իսլանդիան, Շվեդիան, Նոր Զելանդիան, Ֆինլանդիան: Հակառակ բևեռում են Չադը, Սիրիան, Կենտրոնաֆրիկյան Հանրապետությունը, Կոնգոյի Դեմոկրատական Հանրապետությունը և Հյուսիսային Կորեան:
Զեկույցը՝ ԱՅՍՏԵՂ
