Այսօր՝ 2019թ. փետրվարի 5-ին, ՀՀ վարչական դատարանում ցուցարար Վահրամ Պետրոսյանի դեմ Ոստիկանության հայցի քննության շրջանակում ՀՀ ոստիկանության ներկայացուցիչը հայտարարեց, որ «վերջին քաղաքական իրադարձություններով պայմանավորված»՝ ՀՀ ոստիկանությունն ամբողջությամբ հրաժարվում է ցուցարարի դեմ ներկայացրած հայցից:
Հիշեցնենք՝ ՀՀ Ոստիկանությունը վարչական դատարան ներկայացրած հայցով պահանջել էր պատասխանատվության ենթարկել 2015 թ. սեպտեմբերի 1-ին Երևանի Բաղրամյան փողոցում տեղի ունեցած հավաքի մասնակից Վահրամ Պետրոսյանին ոստիկանության օրինական պահանջը չկատարելու համար:
2016 թ. սեպտեմբերի 28-ին ՀՀ Վարչական դատարանը, դատավոր Կարեն Զարիկյանի նախագահությամբ, բավարարել էր ոստիկանության հայցն ու ցուցարարին տուգանել 50.000 ՀՀ դրամով:
Վերաքննիչ դատարանում որոշումը բողոքարկելուց հետո 2017թ. նոյեմբերի 2-ին որոշում էր կայացվել գործը նոր քննության ուղարկելու մասին:
Այսօր դատարանը հայցվոր կողմի միջնորդության հիման վրա կարճեց գործի վարույթը:
