Հայկական միասնական տեղեկատվական կենտրոնը տեղեկացրել է, որ ԱՀ/ԼՂ մայրաքաղաք Ստեփանակերտը հրթիռակոծվել է «Գրադ» և «Սմերչ» կայանքներից։ Ավելի վաղ տեղեկացվել էր, որ բերդաքաղաք Շուշին է հրթիռակոծվել։
ՀՀ Կառավարության պաշտոնական ֆեյսբուքյան էջը տեսանյութ է հրապարակել այն մասին, որ Ադրբեջանը սպիտակ ֆոսֆոր պարունակող արգելված զենք է կիրառում: ՀՀ շրջակա միջավայրի նախարարությունը և 50 հասարակական կազմակերպություն դիմել են միջազգային կառույցների:
Արցախի տեղեկատվական շտաբը հայտնել է, որ Մարտունու շրջանում իրավիճակը մնում է լարված․ ողջ գիշերվա ընթացքում և առավոտյան շարունակվել են հրետակոծությունն ու հրթիռակոծությունը:
Չնայած վտանգավոր իրավիճակին՝ պատկան մարմինները վերականգնողական աշխատանքներ են անում՝ հաճախ հայտնվելով թշնամու թիրախում:
ՀՀ և ԱՀ մարդու իրավունքների պաշտպանները հրապարակել են համատեղ զեկույց ադրբեջանական զինված ուժերի կողմից Արցախում հրկիզող, քիմիական տարրեր պարունակող (հնարավոր է՝ սպիտակ ֆոսֆոր) զանգվածային ոչնչացման զինատեսակ կիրառելու վերաբերյալ:
Մինչ օրս հայկական կողմից ադրբեջանական ագրեսիային զոհ է գնացել ընդհանուր թվով 53 խաղաղ բնակիչ Հայաստանում և Արցախում/ԼՂ։
Լուսանկարում՝ Ստեփանակերտ, Արցախ/ԼՂ (նոյ․ 6)
