Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

ՀՀ Զինված ուժերում շարունակվում են ոչ մարտական պայմաններում զինծառայողների մահվան դեպքերը։ Մասնավորապես, 2020-2024 թվականներին Զինված ուժերում մահացել է 362 զինծառայող, որոնցից մոտ 80 տոկոսը՝ 289-ը ոչ մարտական պայմաններում։ Այս մասին «Խոշտանգումներից, արժանապատվությունը նվաստացնող վերաբերմունքից զերծ մնալու բացարձակ իրավունքի պաշտպանության վիճակը Հայաստանում․ արդյոք հաղթահարելի է անպատժելիությունը» թեմայով քննարկման ժամանակ ասաց Հելսինկյան քաղաքացիական ասամաբլեայի Վանաձորի գրասենյակի Պաշտպանության և անվտանգության բնագավառի նկատմամբ քաղաքացիական վերահսկողության բաժնի համակարգող Նազելի Մովսեսյանը։

Նրա խոսքով՝ 289 զինծառայողից 79-ի մահվան պատճառը ինքնասպանությունն ու սպանությունն է։ Նազելի Մովսեսյանը նշեց, որ պետության կողմից ոչ արդյունավետ քայլերը հանգեցնում են նման դեպքերի կրկնմանը։ Մյուս խնդիրը վերաբերում է առողջական խնդիրներով անձանց զորակոչին։ Նա ասաց, որ վերջին հինգ տարվա ընթացքում 76 զինծառայողի մահվան դեպք է արձանագրվել առողջական վիճակի հետեւանքով։ Ժամկետային զինծառայողների դեպքում զորակոչի ժամանակ պատշաճ հետազոտություններ հիմնականում չեն իրականացվում, ինչը հանգեցնում է զինծառայողների մահվանը։ «Եթե խոսենք Եվրոպայի խորհրդի նախարարների կոմիտեի՝ ՀՀ կառավարությանն ուղղված հանձնարարականների մասին՝ Զինված ուժերում խոշտանգումների վերաբերյալ, կարեւոր եմ համարում նշել, որ երկար տարիների ուսումնասիրության արդյունքում պարզ է դառնում, որ խոշտանգման, կյանքի իրավունքի խախտման դեպքերով քննություններն ընթանում են շատ երկար։ Եվ քննության արդյունավետությունը ոչ այնքան բարձր մակարդակի վրա է, որովհետեւ գործերի քննությունը կամ կարճվում է, կամ կասեցվում»,- ասաց նա։