Հելսինկյան քաղաքացիական ասամբլեայի Վանաձորի գրասենյակ

Human Rigհts Watch միջազգային իրավապաշտպան կազմակերպության 2021-ի տարեկան զեկույցում տեղ են գտել Հելսինկյան քաղաքացիական ասամբլեայի տրամադրած տեղեկությունները՝ Հայաստանում խոշտանգման դեմ պայքարի վիճակի մասին։ Մասնավորապես՝ զեկույցում տեղ է գտել ՀՔԱՎ ուսումնասիրությունից մի հատված․

«Ըստ Հելսինկյան քաղաքացիական ասամբլեայի Վանաձորի գրասենյակ (ՀՔԱՎ) տեղական, ոչ պետական կազմակերպության՝ քրեական հետաքննությունը հիմնականում փակվում է այն հիմքով, որ բացակայում է հանցակազմ կամ կասեցվել է կասկածյալի բացակայության պատճառով։ Խումբը հայտնել է, որ ոչ ոք չի դատապարտվել խոշտանգումների համար 2015 թվականից ի վեր, երբ խոշտանգումն ամրագրվեց որպես առանձին հանցագործություն։ Բոլոր այն դեպքերում, երբ պաշտոնյաները պատասխանատվության են ենթարկվել ֆիզիկական բռնության գործողությունների համար, նրանք դատապարտվել են ընդհանուր «պաշտոնեական դիրքի չարաշահման» համար»:

Human Rigհts Watch-ի տարեկան զեկույցում անդրադարձ կա նաև իրավապաշտպան Սաշիկ Սուլթանյանի նկատմամբ քրեական հետապնդմանը։

«Մարդու իրավունքների եզդիական կենտրոն» ոչ պետական խմբի նախագահ Սաշիկ Սուլթանյանի դեմ իշխանությունները կեղծ քրեական մեղադրանքներ են առաջադրել: Մեղադրանքը բխում է Սուլթանյանի Yezidinews.am կայքին տված հարցազրույցից, որտեղ նա պնդում էր, որ Հայաստանում եզդի փոքրամասնությունների նկատմամբ խտրականություն է դրսևորվում։ Մեղադրանք առաջադրած Ազգային անվտանգության ծառայությունը Սուլթանյանի հարցազրույցը, որը պաշտպանված խոսք էր, սխալ կերպով որակել է որպես «հրահրում»։ Այս պահին դեռևս սպասվում է դատական քննություն»:

Զեկույցում անդրադարձ կա նաև Լեռնային Ղարաբաղի հակամարտության հետևանքներին, իրավապահ համակարգին, հաշմանդամություն ունեցող անձնանց իրավունքներին, կանանց և երեխաների նկատմամբ բռնությանը, սեռական կողմնորոշման և գենդերային ինքնության հարցերին։