Հելսինկյան քաղաքացիական ասամբլեայի Վանաձորի գրասենյակ

2023թ․ նոյեմբերին Կոպենհագենում ՀՔԱ Վանաձորի գրասենյակի Սոցիալ-առողջապահական ծառայությունների մշտադիտարկման բաժնի մասնագետ Սառա Ղազարյանը մասնակցել է Եվրոպայի խորհրդի և ԵԱՀԿ Ժողովրդավարական հաստատությունների և մարդու իրավունքների գրասենյակի (ԵԱՀԿ/ԺՀՄԻԳ) կողմից կազմակերպած Կանխարգելման ազգային մեխանիզմների և հասարակական կազմակերպությունների վեցերորդ տարածաշրջանային հանդիպմանը՝ նվիրված ազատազրկման վայրերում հոգեկան առողջությանը։

Ղազարյանը ներկայացրել է Խնամքի հաստատությունների դիտորդական խմբի գործունեությունը, Խմբի իրավական կարգավորումները, գործունեության մանդատը, ազատազրկման վայրերում մարդու իրավունքների պաշտպանության երաշխիքների ավելացման անհրաժեշտությունը և առավելությունները։ Մասնավորապես Ղազարյանը նշում է, որ ի լրումն կանխարգելման ազգային մեխանիզմի, երկում գործում է լրացուցիչ անկախ մոնիթորինգային ռեսուրս՝ Խումբը, ինչը ապահովում է առանձին իրավունքների վերաբերյալ ավելի խորքային ուսումնասիրության հնարավորություն, միջազգային կազմակերպությունների հետ համագործակցության լրացուցիչ մեխանիզմ։

Աշխատանքային քննարկման երկրորդ օրը Ղազարյանը ներկայացրել է  ՀՔԱՎ-ի կողմից դիտորդական խմբի ստեղծման ուղղությամբ ջատագովությունը, Խմբի զեկույցների հիման վրա միջազգային կազմակերպությունների հետ համագործակցության մեխանիզմները։ Ներկայումս ՀՔԱՎ-ը ռազմավարական դատավարություն է իրականացնում, որը կտանի  նախադեպային իրավունք ձևավորելուն։ Կազմակերպությունը համագործակցում է նաև համապատասխան գերատեսչությունների հետ՝ ռազմավարական փաստաթղթերի մշակման և իրականացման համար։

Ազատազրկման վայրերում հոգեկան առողջության ոլորտում փոփոխությունների հասնելու համար բոլոր մասնակիցները շեշտեցին հետևողականության, համառության անհրաժեշտությունը, զեկույցների հրապարակումը, զեկույցների հասանելիության ապահովումը ազատությունից զրկված անձանց համար։