Factor.am-ը անդրադարձել է Հելսինկյան քաղաքացիական ասամբլեայի Վանաձորի գրասենյակի և մի շարք իրավապաշտպան կազմակերպությունների կողմից պատրաստված «Ինչո՞ւ Լեռնային Ղարաբաղում հայեր չկան» ԶԵԿՈՒՅՑԻՆ։
300-ից ավելի արցախցիներ վկայություն են տվել նախորդ 4 տարիների ընթացքում Ադրբեջանի կողմից հարձակումների ենթարկվելու, ահաբեկման, տարրական իրավունքներից և կենսապայմաններից զրկված լինելու և զանգվածային տեղահանությունների մասին։
Ահաբեկում, մեկուսացում և բռնություն․ արցախցիների իրավունքների այսպիսի խախտումներ են արձանագրել իրավապաշտպան կառույցները փաստահավաք զեկույցում։ Դրանում ամփոփված են 330-ից ավելի մարդկանց վկայությունները, որոնք 2023-ի օգոստոսի դրությամբ բնակվում էին Արցախի 71 տարբեր բնակավայրերում։
Փաստահավաք զեկույցում ուսումնասիրվել են ռուս խաղաղապահ զորակազմի տարածած հաղորդագրությունները․ դրանց մեծ մասի դեպքում արձանագրում է եղել հրադադարի ռեժիմի խախտման մասին։ Զեկույցում ներկայացված են ապացույցներ, որոնք վկայում են՝ ադրբեջանական իշխանություններն իրենց գործողություններն իրականացրել են մեթոդական և համակարգված ձևով՝ նպատակ ունենալով Լեռնային Ղարաբաղը մաքրել էթնիկ հայերից, տարածաշրջանը հայկական պատմական ժառանգությունից ու մշակույթից։
Զեկույցի հեղինակները, ուսումնասիրելով Ադրբեջանի իշխանությունների գործողություններն ու հռետորաբանությունը, նկատել են, որ այն հիմքեր է տալիս եզրակացնելու, որ հայերի բռնի տեղահանումը եղել է միտումնավոր:
Փաստերը ցույց են տալիս, որ գոյություն ունի համակարգված երկարաժամկետ ծրագիր, որն ուղղված է Լեռնային Ղարաբաղը էթնիկ հայ բնակչությունից ազատելուն: Այդ քաղաքականությունն իրականացվել է կանոնավոր գործողությունների միջոցով, որոնք հանդիսանում են մարդու իրավունքների, միջազգային մարդասիրական իրավունքի և միջազգային քրեական իրավունքի կոպիտ խախտումներ։ Ադրբեջանական պետությունն աստիճանաբար և մեթոդաբար ստեղծել է այնպիսի կենսապայմաններ, որոնք նպատակ են ունեցել կա՛մ հայ բնակչության աստիճանական ոչնչացման, կա՛մ էլ անհնարին դարձնելու նրանց մնալն Արցախում, որը հանգեցրել է բռնի տեղահանության:
Մանրամասները՝ տեսանյութում։
Ամբողջական հոդվածը կարող եք կարդալ այս հասցեով՝ https://factor.am/829568.html © factor.am
