Հելսինկյան քաղաքացիական ասամբլեայի Վանաձորի գրասենյակ

ՀՀ առողջապահության նախարար Արսեն Թորոսյանը 2020 թ․ հոկտեմբերի 6-ին մամուլի ասուլիսին, ներկայացնելով իրավիճակը, նշել է, որ ադրբեջանական ագրեսիայի հետևանքով բազմաթիվ են զոհերն ու վիրավորները՝ թե՛ զինծառայողների, թե՛ խաղաղ բնակիչների շրջանում: Նա ցույց է տվել հրթիռի բեկորը՝ դատապարտելով արգելված զինատեսակներով Ստեփանակերտի ռմբակոծումը: Նախարարը մտահոգություն է հայտնել Ստեփանակերտի հիվանդանոցի հնարավոր թիրախավորման կապակցությամբ, ինչը համարվում է պատերազմական հանցագործություն խաղաղ բնակչության նկատմամբ և ասել, որ հաճախ շտապօգնության մեքենաների բնականոն աշխատանքը խաթարվում է հրթիռակոծման հետևանքով:

ՀՀ ՊՆ մամուլի խոսնակ Շուշան Ստեփանյանը, ապա նաև ԱՀ/ԼՂ նախագահի մամուլի խոսնակ Վահրամ Պողոսյանը տեղեկացրել են, որ Ադրբեջանական զինուժը վերսկսել է հրետակոծել և հրթիռակոծել մայրաքաղաք Ստեփանակերտը՝ նորից թիրախավորելով խաղաղ բնակչությանը: Զոհերի և վիրավորների մասին առայժմ  հստակ տվյալներ չկան։

Հոկտեմբերի 6-ի երեկոյան հայտնի դարձավ նաև, որ ՄԻԵԴ-ը բավարարել է ՀՀ Կառավարության պահանջը և կիրառել միջանկյալ միջոց: Որոշման մեջ մասնավորապես ասված է, որ Դատարանը վերահաստատում է միջանյալ միջոց կիրառելու մասին սեպտեմբերի 29-ի որոշումը և կոչ անում ուղղակի կամ անուղղակի ներգրավված բոլոր երկրներին, այդ թվում՝ Թուրքիային, զերծ մնալ քաղաքացիական բնակչության՝ Կոնվենցիայով պաշտպանվող իրավունքները խախտելուց։