Հելսինկյան քաղաքացիական ասամբլեայի Վանաձորի գրասենյակ

Իրավապաշտպան Արթուր Սաքունցը գերիների վերաբերյալ վարչապետի երեկվա հայտարարությունը որակում է որպես աննախադեպ՝ անպատասխանատվության առումով։ Այսօր հրավիրած ասուլիսում Սաքունցն ասաց, որ դա պատասխանատվությունը գերության մեջ գտնվող զինվորների վրա գցելու ակնհայտ դրսևորում է։ Սա նաև պատասխանատվությունից խուսափելու վարքագիծ է։

«Սա ամենևին բարենպաստ ազդեցություն չի կարող ունենալ արդեն ծառայողների ու ծառայության մեկնողների վրա, որովհետև հոգեբանական խնդիր է։ Սա պատասխանատվության չկատարում է, սա մարդուն՝ որպես զոհ դիտարկելու միտումն է, որն անթույլատրելի է»,- նշեց նա։

«Պետք է խոսքը գնար ավելի շուտ պետության կողմից ջանքերի և քայլերի մասին՝ այդ մարդկանց գերությունից օր առաջ, ժամ առաջ ազատելու մասին։ Այսինքն՝ իշխանությունն ամենաբարձր մակարդակով պետք է հենց այդ պատասխանատվության գիտակցումով հանդես գա և ոչ թե մեղավորներ փնտրելու։ Իսկ եթե մեղավորներ փնտրելու հարցը կա, առաջին մեղավորը զինվորական ծառայության կազմակերպողն է՝ Գլխավոր շտաբն ու շտաբի պետը և դրանից ներքև բոլոր հրամանատարական մակարդակները։ Պետության հսկողության տակ են գտնվում զենքով մարդիկ, որոնք հրամանով իրականացնում են պարտականություններ։ Երբ խոսք է գնում հանգամանքների մասին, ապա թիվ մեկ պատասխանատուն պետությունն է, ոչ թե այդ զինվորը, որը գտնվել է այնպիսի հանգամանքներում, որ կամ հանձնվել է թեկուզ, կամ գերեվարվել է։ Եղե՞լ է մի փաստ, երբ ՀՀ զինծառայողը առանց պատերազմական գործողություններին մասնակցելու, գնա կամովին հանձնվի։ Չկա այդպիսի բան։ Եվ նման մոտեցումը նաև անմարդկային վերաբերմունքն է ոչ միայն գերության մեջ գտնվողների, այլ նրանց հարազատների նկատմամբ»,- նշեց նա։

Իրավապաշտպանի խոսքով՝ ՀՀ-ն իր քաղաքացիների իրավունքների ու շահերի պաշտպանության հարցում ունի պատասխանատվություն՝ անկախ նրանից այդ քաղաքացին գտնվում է ՀՀ-ում, թե աշխարհի ցանկացած կետում և անկախ նրանից, թե ինչ կարգավիճակում է։ Այս կոնցեպտը եթե չկա, մնացածն արդեն պատասխանատվությունից խուսափելու միտում է։

«Բառացիորեն ամիսներ առաջ վարչապետը հայտարարեց՝ մեր բոլոր գերիները հերոսներ են և մի երկու ամիս էլ կդիմանան։ Հիմա այդ ի՞նչ փոխվեց։ Մարդկանց կյանքի, արյան վրա հերոսության ձևակերպումը ամենախայտառակ դրսևորումն է և ամենաանմարդկային։ Երբ հարցեր են առաջանում՝ 24 հոգին ո՞նց է անհետ կորել, 12 հոգին ո՞նց են գերի ընկել, այդ հարցերի պատասխանները ոչ թե գերի ընկածների կամ անհետ կորածների մոտ է, այլ զինվորական հրամանատարությանը պետք է ուղղել։ Կանչել և ուղղակի ուսադիրները պոկել»,- հավելեց Սաքունցը։

Ըստ նրա՝ Գլխավոր շտաբի պետը, ԱԱԾ հակահետախուզությունը պետք է Ազգային ժողով հրավիրվեն ու հանրությանը բացատրություն տան՝ ի վերջո՝ ինչպե՞ս եղավ, որ մարդիկ գերեվարվեցին։

lragir.am