Հելսինկյան քաղաքացիական ասամբլեայի Վանաձորի գրասենյակ

Մամուլը ակտիվորեն քննարկում է վերջերս տեղի ունեցող իրադարձությունները, որոնք, այսպես թե այնպես, կապված են Ռոբերտ Քոչարյանի հետ: «Ռոյթերզ» գործակալությանը տված հարցազրույցում խոսել է հզոր ընդդիմադիր ուժերի համախմբման մասին, որոնք պետք է առաջիկայում լուրջ դիմադրություն ներկայացնեն Հայաստանի գործող իշխանությանը և նշել է, որ ինքը ներգրավվելու է այդ ընդդիմության շարքերում, բայց չի նշել՝ ինչ ձևաչափով: Ըստ Ձեզ՝ որո՞նք են այն ուժերը, որոնք կարող են մարտահրավեր նետել Հայաստանի իշխանությունների, և ովքե՞ր են նրանք, որոնք կարող են, Ռոբերտ Քոչարյանի հետ, լուրջ դիմադրություն ցույց տալ ներկայիս իշխանություններին՝ հաշվի առնելով նաև հասարակության վերաբերմունքը նույն Քոչարյանի անձի հանդեպ: «Առաջին լրատվական»-ի այս հարցադրումներին ի պատասխան՝ իրավապաշտպան Արթուր Սաքունցը մասնավորապես ասաց. «Այդ հարցի միջոցով մենք արձանագրում ենք Հայաստանում ներկա իրավիճակի բուն էությունը:

Այդ առումով ես հարցը կբաժանեի երկու մասի. մեկը՝ Ռոբերտ Քոչարյան՝ որպես սիմվոլիկ կերպար, ոչ թե անձ, որով, ըստ էության կարելի է ներկայացնել ամբողջ նախորդ ժամանակահատվածի իշխանությանը՝ մինչև թավշյա հեղափոխությունը, և այդ իշխանությունը բնութագրող երևույթ որպես՝ որպես անձնավորություն, և երկրորդ հարցը արդեն թավշյա հեղափոխությունից հետո մեր քաղաքական համակարգի հետ կապված խնդիրներն են, որի բուն հիմքում ընկած է իշխանություն-ընդդիմություն ձևաչափը: Բայց ամենահիմնական խնդիրը պետության տեսլականի խնդիրն է՝ ինչպիսի պետության կայացման խնդիրը: Այդ պետություն ասածը ներառելու է արդեն բազմիցս նշված՝ արժանապատիվ քաղաքացու կարևորությո՞ւնը, և պետություն՝ քաղաքացո՞ւ համար, թե՞ էլի՝ քաղաքացի՝ պետության համար: Այս հարցերն են ինձ համար չափանիշը՝ որպես իրավապաշտպանի»:

«Եթե թավշյա հեղափոխությունից հետո նախորդ իշխանությունը, որի սիմվոլն է Ռոբերտ Քոչարյանը, մերժված  է, բայց մերժված լինելով հանդերձ հավակնություն ունի քաղաքական դաշտում դերակատարում ունենալու, ապա ես պնդում եմ, որ թավշյա հեղափոխությունից հետո ինչ-որ մի բան չի արվել, երբ որ նա կամ նախկին իշխանությունները իրենց բարոյական իրավունք են վերապահում հանդես գալու որպես քաղաքական սուբյեկտ»,- նշեց նա:

1in.am