Հելսինկյան քաղաքացիական ասամբլեայի Վանաձորի գրասենյակ

 Եթե հետաքրքրված եք ՀՀ աշխատանքի և սոցիալական հարցերի նախարարության ենթակայության ներքո գործող երեխաների, տարեց և հաշմանդամություն ունեցող անձանց խնամքի ծառայություններ մատուցող կազմակերպություններում մարդու իրավունքների պաշտպանությամբ, կարող եք դիմել և միանալ Խնամքի հաստատություններում դիտորդական խմբին։

 Դիտորդական խմբի գործունեության կարգի համաձայն՝ Խմբի անդամ կարող է դառնալ հայերենին տիրապետող, քսանմեկ տարին լրացած ՀՀ քաղաքացին։ Խմբի կազմում ընդգրկվելու համար նախապատվությունը տրվում է իրավաբանի, մանկավարժի, բժշկի, սոցիալական աշխատողի, հոգեբանի մասնագիտություն և առնվազն 3 տարվա մասնագիտական աշխատանքային փորձ ունեցող անձանց, ինչպես նաև այն անձին կամ անձին ներկայացնող հասարակական կազմակերպությանը, որի գործունեությունն առավել սերտ է առնչվում տարեցների, հաշմանդամություն ունեցող անձանց և երեխաների հիմնահարցերին։ Խրախուսվում է ազգային փոքրամասնությունների ներկայացուցիչների ներգրավվածությունը։

 Դիմելու համար անհրաժեշտ է Խնամքի հաստատությունների դիտորդական խումբ/Monitoring Group of Care Houses -ի ֆեյսբուքյան էջին կամ monitoringgroupofsncos@gmail.com հասցեին մինչև սույն թվականի հունիսի 30-ն ուղարկել Ձեր ինքնակենսագրականը և մոտիվացիոն նամակը:

Խմբի գործունեությունն ուղղված է երեխաներին, տարեց և հաշմանդամություն ունեցող անձանց խնամքի ծառայություններ մատուցող կազմակերպություններում մարդու իրավունքների պաշտպանությանը, անձանց խախտված իրավունքների վերականգնմանն ու խախտումների կանխարգելմանը, ոլորտը կանոնակարգող իրավական դաշտի բարելավմանը։