Հելսինկյան քաղաքացիական ասամբլեայի Վանաձորի գրասենյակ

Հայաստանի քաղաքացիական հասարակության շուրջ 25 կազմակերպություններ ու գործիչներ հանդես են եկել հայտարարությամբ, որտեղ նշել են, որ Հայաստանի ինքնիշխանությունը բացարձակ արժեք է եւ իրենք մերժում են այսպես կոչված Միութենական պետության, առավել ևս` Ռուսաստանի կազմ մտնելու բոլոր առկա միտումները:

Հայտարարությունում ասվում է. «Մենք, ներքոստորագրողներս՝ հանդես գալով որպես հայ ժողովրդի ազգային-պետական կամքի կրողներ և ներկայացուցիչներ, հայտարարում ենք մեր անշրջելի ընտրությունն ու դիրքորոշումը հետևյալի մասին.

1) Մեզ համար Հայաստանի ինքնիշխանությունը բացարձակ արժեք է և անսակարկելի երևույթ, ուստի մենք մերժում ենք այսպես կոչված Միութենական պետության, առավել ևս` Ռուսաստանի կազմ մտնելու, կամ որևէ այլ ձևով Ռուսական կայսրության վերականգնմանը մասնակցելու կամ օժանդակելու բոլոր առկա միտումներն ու դրանց քարոզիչներին և ամեն ինչ անելու ենք Հայաստանի ինքնիշխանության դեմ ոտնձգությունները խափանելու համար:

2) Հայաստանի ապագան և հայ ժողովրդի ազգային-պետական ինքնության արդիականացումն ու վերակերտումը մենք տեսնում ենք համամարդկային արժեքների հիման վրա ժողովրդավարության դրոշի ներքո համախմբվող քաղաքակիրթ ազգերի ընտանիքում:

3) Արձանագրելով Ռուսաստանի անկարողությունը Արցախում հայության անվտանգությունը ապահովելու հարցում, ինչի հետևանքով առանց այդ էլ տարածքային մեծ կորուստներ կրած Արցախը պատերազմից հետո ևս շարունակում է փոքրանալ՝ ռուսական պատասխանատվության գոտում գտնվող տարածքների հաշվին, իսկ դրանց վրա բնակվող հայերը ենթարկվում են էթնիկ զտման, Հայաստանի իշխանություններից պահանջում ենք դիմել ՄԱԿ-ի անվտանգության խորհրդին՝ ԵԱՀԿ Մինսկի խմբի շրջանակում ՄԱԿ-ի մանդատ ունեցող միջազգային խաղաղապահներ Արցախում տեղակայելու համար:

4) Դատապարտում ենք Ռուսաստանի շարունակվող ագրեսիան ինքնիշխան Ուկրաինայի նկատմամբ և արձանագրում, որ այն շարունակությունը դարձավ ազատատենչ ժողովուրդների և պետությունների դեմ կայսերապաշտական ոտնձգությունների, ժողովրդավարությունների դեմ բռնապետական ռեժիմների հարձակումների, մասնավորապես՝ 2020թ. Արցախի դեմ ալիևյան ռեժիմի ագրեսիայի, որի հանդեպ միջազգային հանրությունը անհամարժեքորեն մեղմ արձագանքեց: Կոչ ենք անում ՄԱԿ-ին՝ այսուհետ գործուն մեխանիզմներ ներդնել՝ բոլոր միջազգային և ազգամիջյան խնդիրները խաղաղ ճանապարհով և դիվանագիտական մեթոդներով լուծման համար` քաղաքակրթության և միջազգային իրավունքի ժամանակակից ձեռքբերումներին համահունչ»:

Հայտարարությունը բաց է միանալու համար։

Ազգային ժողովրդավարական բեւեռ

Ազգային ինքնորոշում միավորում

Ինքնիշխան Հայաստան կուսակցություն

Հայաստանի Եվրոպական կուսակցություն

Հայ կառուցողական կուսակցություն

Շանթ Դաշինք ազգայնական կուսակցություն

Պահպանողական կուսակցություն

«Ազատ քաղաքացի» քաղաքացիական նախաձեռնությունների աջակցման կենտրոն ՀԿ

Բաց հասարակության հիմնադրամներ - Հայաստան

Ժուռնալիստների «Ասպարեզ» ակումբ

Իրազեկ քաղաքացիների միավորում ՀԿ

Կանանց ռեսուրսային կենտրոն ՀԿ

«Հանուն հավասար իրավունքների» ՀԿ

«Հելսինկյան ասոցիացիա» իրավապաշտպան ՀԿ

Հելսինկյան քաղաքացիական ասամբլեայի Վանաձորի գրասենյակ

Միջազգային եւ անվտանգային հարցերով հայկական ինստիտուտ

«Մոդուս Վիվենդի» ՀԿ

Սպառողների խորհրդատվության կենտրոն ՀԿ

Տնտեսական իրավունքի կենտրոն ՀԿ

Արմեն Հովհաննիսյան, լրագրող, վերլուծաբան

Նինա Կարապետյանց, իրավապաշտպան

Հրաչյա Արզումանյան, Ռազմական եւ ազգային անվտանգության խնդիրներով փորձագետ, քաղաքական գիտությունների դոկտոր

Հովհաննես Հովհաննիսյան, ՀՀ կանաչ ծրագրերի հեղինակ

Սարո Սարոյան, քաղաքագետ

Հարութ Քալաջյան, հասարակական գործիչ