Հելսինկյան քաղաքացիական ասամբլեայի Վանաձորի գրասենյակ

«Շատ կարևոր է, որ անվտանգային ոլորտի բոլոր դերակատարները, այդ թվում՝  քաղաքացիական հասարակությունը, կատարեն զինված ուժերի նկատմամբ վերահսկողական գործառույթը։  Պետության ժողովրդավարության մակարդակը կապվում է մեծ մասամբ քաղաքացիական հասարակությանը ընձեռնված հնարավորությունների հետ»,- Արմինե Մարգարյան։

Այս կարծիքն է արտահայտում ռազմական հարցերով փորձագետ, Հելսինկյան քաղաքացիական ասամբլեայի Վանաձորի գրասենյակի օրերս ներկայացրած «Զինված ուժերի բարեփոխումների վերաբերյալ կանաչ թուղթ» աշխատության համահեղինակ Արմինե Մարգարյանը՝  թեմայի շրջանակում հարցազրույցի ընթացքում։            

Ինչպես նշում է փորձագետը՝ քաղաքացիական հասարակությունը պետք է մասնակցի անվտանգային ոլորտի քաղաքականության մշակման գործընթացին։ Օրինակ՝ քաղաքացիական հասարակությունը մոնիտորինգի է ենթարկում որոշումների կատարման ընթացքը, անկախ վերլուծություններ է ներկայացնում, հարցազրույցներով է հանդես գալիս, իրազեկման աշխատանքներ է անում, հանրությանն է կրթում։ Սակայն քաղաքացիական հասարակությունը չի կարող լինել արդյունվետ, եթե չկա պետական մարմինների շահագրգռվածություն։