Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

2011 թվականին ադրբեջանցու սպանության մեջ մեղադրվող ՀՀ քաղաքացի Միսակ Լազարյանը ուրբաթ օրը դուրս է եկել հացադուլից և երեկ արդեն տեղափոխվել է իր խուց։ Այդ մասին «Առաջին լրատվական»-ի հետ զրույցում ասաց ԱԺ անկախ պատգամավոր Արման Բաբաջանյանը, որը տեսակցության էր գնացել Լազարյանին «Արմավիր» ՔԿՀ-ում։

Հիշեցնենք, որ Միսակ Լազարյանի հետ կապված աղմուկը բարձրացավ այն բանից հետո, երբ պարզվեց, որ Հայաստանը պատրաստվում է ադրբեջանցու սպանության մեջ մեղադրվող ՀՀ քաղաքացուն արտահանձնել ՌԴ-ին, քանի որ սպանությունը տեղի էր ունեցել Ռուսաստանում, իսկ Լազարյանը հաշվառված է ՌԴ Ամուրի մարզի Ռայչիխինսկ քաղաքում և սպանության համար՝ ՌԴ Քրեական օրենսգրքի 105 հոդվածի 2-րդ մասի «ժ» կետով, հետախուզվում է ՌԴ իրավապահ մարմինների կողմից:

Միսակ Լազարյանին Ռուսաստանում մեղադրանք է առաջադրվել այն բանի համար, որ նա, 2011 թվականի դեկտեմբերի 22-ին, մեկ այլ անձի հետ նախնական համաձայնությամբ, ենթադրաբար սպանել է Ադրբեջանի Զումուրխաչ գյուղի բնակիչ Ջաբար Ալիևին:

ՀՀ իրավապահներին ներկայացած Լազարյանը հայտնել է, որ ինքը չի սպանել Ջ. Ալիևին, սակայն տեղյակ է դեպքից և պատրաստ է Հայաստանի Հանրապետությունում համապատասխան վարույթ սկսելու դեպքում պատմել ամբողջ իրականությունը և պատասխանատվություն կրել ՀՀ օրենքներով: Ըստ Լազարյանի՝ ադրբեջանցի Ջ. Ալիևի նկատմամբ բռնություն կիրառելու պատճառն այն է եղել, որ վերջինս ռասսայական, ազգային և կրոնական շարժառիթներով հայ ազգի նկատմամբ պարբերաբար դրսևորել է բացահայտ անհարգալից վերաբերմունք, ինչն արտահայտվել է նրա կողմից պարբերաբար հայ ազգի ինքնությունը վիրավորող և հայ ազգի նկատմամբ թշնամական տրամադրվածություն ստեղծող հրապարակային կոչեր հնչեցնելով ու տարածելով: Եվ չնայած այն բանին, որ Լազարյանը ինքնակամ ներկայացել է ՀՀ իրավապահներին, ամեն դեպքում հենց նույն օրը ձերբակալվել է, իսկ երեք օր անց՝ 2020 թվականի մարտի 13-ին, Երևան քաղաքի ընդհանուր իրավասության դատարանը դատախազության միջնորդությունը բավարարելով՝ Լազարյանի նկատմամբ կիրառել է ժամանակավոր կալանավորում՝ 40 օրով, որի ընթացքում Ռուսաստանից ստացված հանձնման պահանջի հիման վրա նա պետք է հանձնվի ՌԴ իրավապահներին:

2020 թվականի ապրիլի 1-ին ՀՀ դատախազությունը միջնորդել է Մ. Լազարյանին երկու ամիս ժամանակով կալանավորել: Երևանի ընդհանուր իրավասության դատարանի դատավոր Տաթևիկ Գրիգորյանը ապրիլի 2-ին, ըստ փաստաբանի՝ անհիմն կերպով բավարարել է դատախազի բերած միջնորդությունը:

Բաբաջանյանը մեզ հետ զրույցում ասաց, որ Լազարյանի փաստաթղթերի հետ կապված բազմաթիվ խնդիրներ կան, բայց պետք է գտնվեն միջոցներ նրա խափանման միջոցը փոխելու, ապա նաև նրա արտահանձնման հետ կապված դժվարությունները հաղթահարելու համար։ «Կարծում եմ՝ պետք է գտնել ելքեր չափազանց խոհեմ այս երիտասարդի հարցը լուծելու համար, որ իր ընտանիքի պաշտպանության համար ադրբեջանցու հետ տեղի ունեցած միջադեպի հետևանքով հայտնվել է այդ միջադեպի մեջ, ադրբեջանցին սպանվել է, և Լազարյանի համոզմամբ, ինքը սպանության հետ կապ չունի»,- ասաց պատգամավորը՝ հավելելով, որ Ռուսաստանում Լազարյանի նկատմամբ որպես խափանման միջոց է ընտրվել ստորագրությունը չհեռանալու մասին։ Նա իրավապահների հետ երբեք խնդիր չի ունեցել, անգամ դիմում է գրել ՀՀ ոստիկանությունում աշխատանքի անցնելու համար, սակայն հենց այդ փուլում էլ հայտնվել է ՀՀ իրավապահների ուշադրության կենտրոնում։ «Միսակ Լազարյանը հանցագործ հակումներ չունի։ Նա մեր բոլորի պաշտպանության կարիքն ունի։ Սա մեր պատվի և արժանապատվության հարցն է, և մենք ոչինչ չպետք է խնայենք նրան արժանի պաշտպանության տակ առնելու համար»,- ասաց Բաբաջանյանը՝ հավելելով, որ պատրաստվում է շատ արագ կապվել գլխավոր դատախազի, ՄԻՊ-ի հետ՝ ելքերը քննարկելու և Միսակ Լազարյանին «այս մղձավանջից ազատելու համար։

Երեկ օրվա վերջում Բաբաջանյանը հանդիպել է նաև գլխավոր դատախազ Արթուր Դավթյանին։

Իրավապաշտպան Արթուր Սաքունցը կարևոր հանգամանք է արձանագրում, որ,
հաշվի առնելով Մարդու իրավունքների եվրոպական կոնվենցիայով վերցրած պարտավորությունները` խոշտանգումներից զերծ մնալու անձի բացարձակ իրավունքի պաշտպանությունը պետության կողմից, հաշվի առնելով ՌԴ-ում և հատկապես ազատազրկման վայրերում, մասնավորապես քրեակատարողական հիմնարկներում, խոշտանգումների, ֆիզիկական և հոգեբանական ճնշումների տարածվածությունը և ՌԴ-ի կողմից որպես ԵԽ-ի անդամ պետություն իր պարտավորությունների ոչ պատշաճ կատարումը, անկախ կատարած հանցագործության բնույթից, որում մեղադրվում է անձը, նրա արտահանձնումը կարող է հանգեցնել ՀՀ-ի կողմից կոնվենցիայով սահմանված խոշտանգումներից զերծ մնալու անձի բացարձակ իրավունքի խախտմանը, որի համար պատասխանատվությունը կկրի Հայաստանի Հանրապետությունը։ «Արձանագրեմ՝ այս սկզբունքը որևէ կերպ պայմանավորված չէ անձի քաղաքացիությունից։ Քննությունը կարող է և պետք է իրականացվի ՀՀ-ում»,- պնդում է իրավապաշտպանը։

Հ․Գ. Ի դեպ, Բաբաջանյանն ասաց, որ Միսակ Լազարյանը ԵԿՄ անդամ է, Աջափնյակի մասնաճյուղում դիմում ունի ներկայացրած կառույցին անդամագրվելու համար։ 2016-ին էլ՝ Ապրիլյան քառօրյայի ժամանակ, ցանկություն է հայտնել որպես կամավորական մեկնել ռազմաճակատ, սակայն անձնագիր չունենալու պատճառով նրա դիմումը մերժվել է։

Հանդիպումից հետո Բաբաջանյանն ասաց, որ կարող է վստահեցնել՝ Հայաստանի դատախազությունն այս պահին համակողմանիորեն ուսումնասիրում է Միսաք Լազարյանի նկատմամբ հարուցված քրգործի մանրամասները։ «2012 թվականից սկսած վերջինիս կյանքի որոշ կարևոր դրվագներ, որից հետո որևէ կասկած չպետք է ունենանք, որ սույն գործով Միսաք Լազարյանի վերաբերյալ կկայացվի որոշում, որը համահունչ կլինի մեր պետության շահերին և մեր բոլորի սպասումներին։ Չափազանց կարևոր է, որ այս հանգրվանում, այս գործով մենք պահպանենք հանրային տրամադրությունների հանդարտություն և թույլ չտանք, որ այդ տրամադրությունները որևէ ձևով ազդեն գործի հանգուցալուծման վրա»,-ասաց Բաբաջանյանը՝ հավելելով, որ որպես ԱԺ պատգամավոր, խոստանում է կապի մեջ մնալ Արմավիր ՔԿՀ-ում պահվող Միսաք Լազարյանի և նրա պաշտպանի հետ։ Գործով որևէ բեկումնային փոփոխության դեպքում անմիջապես կտեղեկացնի լրատվամիջոցներին։

1in.am