Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Իրավապաշտպան Արթուր Սաքունցն իր ֆեյսբուքյան էջում գրում է.

«Պատգամավորը կամ պաշտոնատար որևէ անձ պետք է իմանա մեկընդմիշտ, որ ենթակա է հանրության և զլմ-երի կողմից ամենախիստ, այդ թվում թեկուզ իր տեսակետից ոչ հաճելի, թեկուզ ամենասուր, թեկուզ ամենաանհիմն քննադատության և խոսքերի:

Ոչ ոք ոչ մեկին չի ստիպել զբաղվել այնպիսի աշխատանքով, որը կապված է հենց հանրության համար որոշումների կայացման հետ:

Քաղաքացիները վճարում են հարկեր, որոնց հաշվին ապահովվում է պետական մարմինների և նրանց աշխատակիցների գործունեությունը, որոնք պետք է զբաղվեն իրենց հարկատուների ընդհանուր խնդիրների լուծման համար կարևոր որոշումներ ընդունելով:

Բացարձակ անհամատեղելի է ժողովրդավարական պետությունում պաշտոնատար անձի, այն էլ ԱԺ պատգամավորի կամ նախարարի կողմից որևէ քաղաքացու կամ ԶԼՄ-ի նկատմամբ որևէ դատական հայցի ներկայացումը:

Նման գործելակերպը համարում եմ պաշտոնատար անձի կողմից գրաքննության փորձ:

Հուսով եմ դատավորները պետք է, եթե ունեն համարժեք կարողություն և պատրաստվածություն, մերժեն բոլոր հայցադիմումները, որպեսզի պաշտպանված լինի կարծիքի արտահայտման ազատությունը:

Հակառակ պարագայում, դատարանների կողմից զրպարտության կամ վիրավորանքի հիմքով պաշտոնատար անձանց կողմից ԶԼՄ-երի, քաղաքացիների դեմ հայցերի բավարարման շարանը կհանգեցնի օրենքի ուժով գրաքննության ինստիտուտի ամրագրմանը, և հետևաբար ազատ խոսքի և կարծիքի արտահայտման սահմանափակմանը պետության կողմից, որն անհամատեղելի է և անհրաժեշտ չի կարող համարվել ժողովրդավարական պետության շահերի տեսանկյունից:

Չեք կարողանում տանել նաև Ձեզ համար ոչ հաճելի խոսքն ու կարծիքը, որոնց տանելն էլ է Ձեր պարտավորությունների մեջ, կարող եք հրաժարական տալ:

Իսկ կեղծ տեղեկությունների դեմ միակ և օրինական ճանապարհը պաշտոնատար անձանց համար, հանդիսանում է ճշմարիտ տեղեկություններ տրամադրելը հանրությանը, որպեսզի հանրությունը հնարավրություն ունենա ազատ և անկաշկանդ իր կարծիքը ձևավորել երևույթի, կամ ենթադրյալ փաստի մասին, որի վերաբերյալ տարածվել են տարբեր, նաև իրար հակասող տեղեկությունները:

Այլ տարբերակ և այլ ճանապարհ չկա:

Սա վերաբերվում է նաև քաղաքական և հանրային գործիչներին:

Նման հարցերի քննարկման համար, ծայրահեղ դեպքում կան ԶԼՄ-երի ինքնակարգավորման, էթիկայի մարմիններ»:

168.am