Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Սահմանադրական դատարանի դատավորի պաշտոնում փաստաբան Վահե Գրիգորյանի ընտրությունը նոր իրողություններ է առաջ բերում Մարտի 1-ի գործում: Եվ պատճառը միայն այն չէ, որ Վահե Գրիգորյանի ընտրությունը դատաիրավական համակարգում ընկալվում է որպես հեղափոխության հերթական փուլի դրվագ։ Նրա ընտրությունը մարտիմեկյան գործում նոր իրողություն է ենթադրում գործի բովանդակությանն առնչվող առավել կոնկրետ դրվագներով: Գրիգորյանը Մարտի 1-ի զոհերի հարազատների շահերի պաշտպանն էր: Ընդ որում, այստեղ պետք է խոսել ոչ միայն զուտ իրավական հանգամանքի մասին, որպես գործունեություն ծավալած փաստաբան․ մի շարք հանգամանքների բերումով Վահե Գրիգորյանը «քաղաքական անտուրաժ» ապահովող փաստաբան էր:

Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Արթուր Սաքունցը, վերլուծաբան Հակոբ Բադալյանը և քաղաքագետ Աղասի Մարգարյանը:

Հակոբ Բադալյանի դիտարկմամբ՝ Սահմանադրական դատարանի շուրջ զարգացումները խորքային լուրջ ճգնաժամի մասին են վկայում, որ կա Հայաստանի իրավական ոլորտում: Վերլուծաբանը նշեց, որ Հայաստանում հեղափոխությունից հետո նոր համակարգ, այդ թվում նաև նոր, անկախ դատական համակարգ ստեղծելու խնդիրներ կան:

Արթուր Սաքունցը հիշեցրեց, որ Վահե Գրիգորյանը ոչ միայն Մարտի 1-ին սպանվածների հարազատների՝ որպես տուժողների իրավահաջորդն է, այլ նաև Հյուսիսային պողոտայի հանրային գերակա շահի անվան տակ սեփականազրկված քաղաքացիների իրավապաշտպանությունն է իրականացրել, որի հետևանքով քրեական գործ է հարուցվել և նա քաղբանտարկյալ է դարձել՝ մի քանի ամիս գտնվելով բանտում: Սաքունցի խոսքով՝ Վահե Գրիգորյանը ամբողջությամբ տիրապետում է դատական համակարգում տիրող իրավիճակին: «Որպես իրավաբան, փաստաբան Վ. Գրիգորյանը եղել է առաջնագծում»:

Իրավապաշտպանը նաև ընդգծեց, որ Սահմանադրությունը, որի հեղինակներից է ՍԴ նախագահ կարգված Հրայր Թովմասյանը, «կարված է» Սերժ Սարգսյանի իշխանության ապահովման համար. «Այդ Սահմանադրությունից բխող իրավական կարգավորումներով որևէ գործողություն կատարելը անխուսափելիորեն հանգեցնելու էր ճգնաժամի, որովհետև նոր իշխանության ժողովրդավարական և իրավական պետություն կայացնելու բնույթը և ձգտումը հակասության մեջ էին մտնելու այն կարգավորումների հետ, որոնք բոլորովին այլ բնույթի իշխանության համար էին ստեղծված… Այս Սահմանադրությունը ժողովրդավարական կառավարման համար փակուղի է, այն նաև ծուղակ է…»:

«Առկա է քաղաքական ճգնաժամ, իրավական ճգնաժամի մասին չեմ ցանկանա շատ խոսել, բայց ակնհայտ է, որ Սահմանադրության մի հոդվածը հակասում է մյուսին, կիսատ հոդվածներ կան. հապճեպ գրված Սահմանադրություն է: Գրել են պրոֆեսիոնալներ, հասկացել են՝ ինչ նպատակով են գրում, և հապճեպությունը բերել է հետաքրքիր «վիրիպակների,- նշեց Աղասի Մարգարյանը:- Վահե Գրիգորյանն իր հայտարարությամբ շեշտեց, որ հայտնվել ենք սահմանադրական ճգնաժամի մեջ: Դատական համակարգն ամեն կերպ հարմարեցված է եղել և ծառայել է ավտորիտարիզմի ձգտող իշխանական  համակարգին, հիմա փոխվել է կառավարման համակարգը, փոխվել են հարաբերությունները, բայց դատական համակարգը շարունակում է իներցիայով գործել»:

Հակոբ Բադալյանն ընդգծեց, որ Հայաստանում հերթով պայթում են իրավաքաղաքական ականները. նախկին համակարգը ճգնաժամ է ապրում:

Մանրամասն՝ տեսանյութում:

1in.am