Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Անկախ նպատակից՝ քարոզարշավի ընթացքում դրամական պարգև խոստանալու գայթակղությունից պետք է զերծ մնալ, արձագանքելով վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանի երեկվա հայտարարությանը, կարծիք հայտնեց իրավապաշտպան, «Անկախ դիտորդ» նախաձեռնության անդամ Արթուր Սաքունցը:

Երեկ Ջերմուկում Փաշինյանը խոստացավ, որ «Քաղաքացիական պայմանագիր» կուսակցությունը ընտրակաշառքի մասին վկայող տեսանյութի դիմաց քաղաքացիներին 500 հազար դրամ կվճարի:

«Կուսակցությունը պետք է զերծ մնա նախընտրական քարոզչության ժամանակահատվածում դրամական որևիցե պարգև հատկացնելու կամ տրամադրելու, խոստումներ տալու մասին, անկախ նրանից, թե դա ինչ նպատակով է արվում, առավել կարևոր են նախընտրական քարոզչությունը, ընտրությունները ազատ և արդար անցկացնելու համար», - նշեց Սաքունցը:

Վարչապետի պաշտոնակատարի հայտարարության վերաբերյալ հրապարակումներն ուսումնասիրվել են Գլխավոր դատախազությունում, պարզվել է, որ քրեադատավարական ընթացակարգ ապահովելու հիմքերը բացակայում են, «Ազատությանն» ասաց գլխավոր դատախազի խորհրդական Գոռ Աբրահամյանը:

Փաշինյանի հայտարարությունը քաղաքացիները երեկ մեծ ոգևորությամբ ընդունեցին: «1000 դոլարին համարժեք 500 հազար դրամ պարգև այն քաղաքացիներին, ովքեր կամ ընտրակաշառք տալու-ստանալու փորձ կնկարահանեն տեսանյութով, և երկրորդը՝ պետական կամ ոչ պետական հիմնարկների աշխատողների կողմից՝ տեղական ինքնակառավարման մարմիններ և այլ, կնկարահանեն ընտրողի վրա ապօրինի ազդեցություն գործելու փորձը: Այդ դեպքերում 500 հազար դրամ պարգև՝ յուրաքանչյուր այդպիսի տեսագրության համար», - հայտարարել է Փաշինյանը:

Իրավապաշտպան Սաքունցը նաև այլ հարց է բարձրացնում՝ նշանակո՞ւմ է սա արդյոք, որ իշխանությունները վստահություն չունեն իրավապահ մարմինների նկատմամբ. «Պե՞տք է ենթադրել, որ Փաշինյանը կամ իշխանությունը վերապահումներ ունի իրավապահ մարմինների կարողությունների վրա, որ կարող են, ասենք, ընտրակաշառքի դեպքերը բացահայտել: Այստեղ ակամա ընդունում են մի բան, որ իրապես պետք է այդ մարմինները անպայման համապատասխան կարողություններով օժտված լինեն, որը, ցավոք սրտի, ռեսուրսների առումով, գիտելիքների առումով, կարողությունների առումով, փաստորեն, չեն կարող»:

Միևնույն ժամանակ Արթուր Սաքունցը նկատում է՝ կաշառքը ամենադժվար բացահայտելի գործերից է:

Նախընտրական այս շրջանում ընտրախախտումների վերաբերյալ դատախազությունը 140 հաղորդում և ահազանգ է ստացել, 6 դեպքով քրեական գործեր են հարուցվել, մեծ մասը ընտրակաշառք տալ, ստանալու կամ միջնորդելու վերաբերյալ:

azatutyun.am