Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

ՀՔԱ Վանաձորի գրասենյակը 2023թ․-ից զբաղվում է Ադրբեջանի սանձազերծած  գործողությունների հետևանքով բռնի տեղահանված անձանց իրավունքների պաշտպանությամբ։ Կազմակերպությունը տարեկան 1900-ից ավելի իրավախորհրդատվություն է տրամադրում  բռնի տեղահանված անձանց, անհրաժեշտության դեպքում դիմումներ ներկայացնում դատարան, արձանագրում խախտված իրավունքի վերականգնման դեպքեր, որոնցից մեկը ստորև․ 

Կազմակերպությանը դիմած ԼՂ-ի քաղաքացի Մ․Գ․-ն 2012թ․-ից ամուսնացած է եղել, սակայն վերջինիս ամուսինը 2023թ․-ի սեպտեմբերի 19-ին մարտական գործողությունների պատճառով մահացել է։ Սեպտեմբերին Մ․Գ․-ն անչափահաս երեխաների հետ բռնի տեղահանվել է Հայաստան, որտեղ էլ փորձել է ընդունել ամուսնու ժառանգությունը` մեքենան և Լեռնային Ղարաբաղում թողած տունը։ Քանի որ ՀՀ նոտարական գրասենյակում հրաժարվել են հաստատել ժառանգությունը, Մ․Գ․-ն դիմել է ՀՔԱ Վանաձորի գրասենյակ։ 

Կազմակերպությունը, հանձին իրավաբան Լիանա Մխոյանի, հայցադիմում է ներկայացրել ՀՀ Լոռու մարզի առաջին ատյանի ընդհանուր իրավասության դատարան՝ խնդրելով Մ․Գ․-ին ճանաչել ամուսնու ժառանգ։  Դատարանը ապրիլի 16-ի  վճռով  հայցը բավարարվել է։ 

Արձանագրում ենք այն փաստը, որ ԼՂ-ից բռնի տեղահանված անձինք չեն զրկվել իրենց սեփականության իրավունքից, և անկախ այն հանգամանքից, որ վերջիններս ներկայումս փաստացի չեն տնօրինում իրենց սեփականությունը, այնուհանդերձ որևէ կերպ չի դադարում նրանց սեփականության իրավունքը ԼՂ-ում գտնվող գույքի/սեփականության նկատմամբ։ Թեև տեղի է ունենում սեփականության իրավունքի շարունակական խախտում,  նման իրավական գնահատականների պայմաններում մահացած անձանց գույքի իրավական կարգավիճակը չի մնում անորոշ․ ժառանգության ընդունման արդյունքում պահպանվում է սեփականության հիմնարար իրավունքի իրավահաջորդականությունը։ 

ՀՔԱՎ գրասենյակը շարունակում է տրամադրել անվճար իրավաբանական աջակցություն ԼՂ-ից բռնի տեղահանված անձանց։ Աջակցության համար կարող եք զանգահարել`   

094042268  
094962324  
011242268  
077342268։  

Ծրագիրը համաֆինանսավորվում է Եվրոպական միության կողմից և Ժողովրդավարության զարգացման հիմնադրամի աջակցությամբ։