Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Ցավոք, մարդու իրավունքների շուրջ խոսակցությունը սահմանադրության փոփոխությունների գործընթացի շրջանակներում դեռևս կենտրոնական չէ»,- «Մեդիա կենտրոնում» «Սահմանադրության փոփոխությունների մարդու իրավունքների օրակարգը» թեմայով քննարկմանը հայտարարեց Մարդու իրավունքների հետազոտությունների կենտրոնի տնօրեն, հետազոտող Անահիտ Սիմոնյանը:

Նա վստահեցրեց՝ մարդու իրավունքների օրակարգը չի կարող ստվերվել որևէ այլ օրակարգով կամ այլ քննարկումների ուղղությամբ, երբ խնդիրը սահմանադրության փոփոխությունն է: Նա հայտարարեց. «Այս Սահմանադրությունը պետք է միանշանակ ուղղված լինի քաղաքական իրավունքների ու ազատությունների պաշտպանությանը: Այն պետք է բացառի այն խնդիրների կրկնությունը, որոնք պատճառ դարձան տարիներ շարունակ մարդու իրավունքների ոտնահարման: Սա գործընթաց է, որը պետք է ապահովի այն արժեքների վերականգնումը, որի համար տեղի է ունեցել հեղափոխությունը: Պետք է բացառի այն խնդիրների կրկնումը, որոնք պատճառ դարձան տարիների շարունակ մարդու իրավունքների լայնածավալ ոտնահարումների: Մեր պահանջն է նաև, որ մարդու իրավունքների վերաբերյալ հարցերն արտացոլվեն և տեղ գտնեն հայեցակարգում: Պետք է շատ հստակ արձանագրել՝ այլևս երբևէ ՀՀ-ում Սահմանադրության փոփոխությունը չի կարող ծառայեցվել մարդու իրավունքների երաշխիքների նվազեցման համար: Սա պետք է հստակ քաղաքական երաշխիք լինի»:

Մարդու իրավունքների հետազոտությունների կենտրոնի ծրագրի հետազոտող Նվարդ Փիլիպոսյանը տեղեկացրեց՝ իրականացրել են ուսումնասիրություն, որտեղ ամրագրված են նաև իրենց առաջարկները: Սկզբունքային առաջարկն է երաշխիքների վերականգնումը. այն երաշխիքների, որոնք եղել են 2005-ի խմբագրությամբ Սահմանադրության մեջ և վերացվել են 2015-ի խմբագրությամբ Սահմանադրությունից: Առաջարկներից է նաև, որպեսզի հայեցակարգում ամրագրվի բովանդակային հավասարության սկզբունքը:

Փաստաբան Կարեն Թումանյանը խոսեց հստակ ձևակերպումների անհրաժեշտության մասին. «Մեզ մոտ միշտ հարց է առաջանում, եթե հստակ ձևակերպում չկա, ապա ԱԺ-ն դրույթը կմեկնաբանի հայեցողական տեսակետից, իրավունքի իրացման տեսակետից: Օրինակ՝ չէինք պլանավորել արտակարգ դրություն, որ կարող էր այսքան երկար լինել, և կիրառվեին սահմանափակումներ, որոնք Սահմանադրությունից կամ օրենքներից հեռու են, բայց իշխանությունները պետք է նաև դրան պատրաստ լինեն, որ սահմանադրական փոփոխությունները չլինեն ինքնանպատակ կամ հայեցողական»:

ՀՔԱՎ գրասենյակի ղեկավար Արթուր Սաքունցը մտահոգություն հայտնեց՝ սահմանադրական փոփոխությունների գործընթացում մասնակցայնություն, թափանցիկություն, ցավոք, չկա. «Շատ կարևոր երաշխիք է մասնակցայնությունը, որը չկա: Քաղհասարակության ներկայացուցիչները ներգրավված են Սահմանադրական բարեփոխումների մասնագիտական հանձնաժողովում, բայց դա այն երաշխիքը չէ, որը պետք է լինի: Այս պահին ՀՀ-ում կա՞ այն մթնոլորտը, բանավեճը, մտքերի բախումները, որոնք հիմք են տալիս մտածելու, որ ՀՀ-ում տեղի է ունենում սահմանադրական փոփոխությունների գործընթաց: Ամրագրում ենք հաշվետու և թափանցիկ կառավարման սկզբունքների ակնհայտ հետընթաց: Հաշվետվողականությունը ենթադրում է նաև նախագծերի մշակման, որոշումների կայացման, մտադրությունների մասին ոչ միայն հայտնել, այլև այդ գործընթացի բոլոր փուլերում անընդհատ ապահովել մասնակցայնություն, հրապարակայնություն, թափանցիկություն: Մինչև հիմա հայեցակարգ չկա: Պարոնա′յք, տիկնա′յք, ի՞նչ արժեքային հիմքով եք ձեռնամուխ եղել Սահմանադրության՝ այսպես կոչված բարեփոխումներին»:

aravot.am