Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

ՀՀ արդարադատության նախարարությունը հանրային քննարկման է ներկայացրել ՔԿՀ-ներում բարեփոխումների իրականացման 20-ամյա ռազմավարությունը, որի ներկայացումն այդ կերպ, նախարարին կից հասարակական խորհրդի անդամներ Արթուր Սաքունցը եւ Արշակ Գասպարյանը չեն պատկերացնում, թե ինչո՞ւ է:

Այսօր «Մեդիա կենտրոնում» կազմակերպված քննարկմանը, որին ՀՀ արդարադատության նախարարության ներկայացուցիչը չէր ներկայացել, «Սոցիալական արդարություն» հկ-ի ղեկավար Արշակ Գասպարյանն ասաց. «Բանտային 20-ամյա ռազմավարություն չի լինում, որովհետեւ ռազմավարությունը նշանակում է գումար եւ մարդկային ռեսուրսի կուտակում: Եթե նախկին իշխանությունների նման, դա դիտարկում ենք որպես թղթի մի կտոր, որը դե կանենք`կանենք, չէ`չէ. դա այլ: Իսկ եթե ռազմավարությունը դիտարկում ենք, թե ի՞նչ է լինելու 20 տարի հետո այդ ոլորտում, ապա քսանամյա չի կարող լինել, քանի որ ոլորտը «շնչող» է, ստատիկ չէ, որպեսզի այդ հատվածի համար պլանավորումներ անես: Չկա որեւէ բարեփոխում, որը հինգ տարում չի կարելի անել, ռեսուրսները պետք է արդյունավետ օգտագործել»:

Նաեւ, ըստ բանախոսի, եթե համընթաց չեն զարգանում պետական եւ հ/կ-ների կողմից տրամադրվող սոցիալական ծառայությունները, ապա քսանամյա պլանավորումն անիմաստ է դառնում: Իսկ սոցապ նախարարության նման քսանամյա ծրագիր մենք չունենք: «Ուստի, այս ռազմավարությունը, որտեղ պրոբացիայի եւ շատ այլ բաների մասին ոչինչ չկա, չի կարող գործել, մանավանդ, որի գործողությունները 10-20 տարվա համար են նախատեսված: Քսանամյա ռազմավարությունը ենթադրում է չկատարված գործողությունների արդարացում: Այս փաստաթղթում չկան ռիսկերի, կարիքների գնահատման ծրագրեր: Բյուջեից անընդհատ միլիոններ ենք ծախսելու, այն դեպքում, երբ նախատեսվում է ընդամենը երկու նոր ՔԿՀ-ի կառուցում, այն դեպքում, երբ դրա կարիքն ընդհանրապես չկա: Այսօր մենք կարող ենք «Վարդաշեն» ՔԿՀ-ն տեղափոխել «Արմավիր» ՔԿՀ-ի կորպուսներից մեկը: Այդ խնայողությունների հաշվին կարելի է մեկ այլ հիմնարկ վերանորոգել»,- ասաց բանախոսը` հավելելով, որ երբ անում ես բանտային բարեփոխում`հիմքում պետք է լինի մարդու իրավունքների պաշտպանությունը. այս փաստաթղթում դա եւս չկա, չկան նաեւ միջազգային զարգացման միտումները: «Բոլոր 11 կետերում գրված է`ուսումնասիրել այսինչը, այնինչը, վերջում էլ գրած է`գնահատել բանտային համակարգի շարժվելու ուղին: Եթե այս ամենը դեռ արած չկա, ուրեմն դու ռազմավարություն չես կարող ունենալ: Ռազմավարության մեջ ուսումնասիրություն անել չես կարող: Ֆինանսական հետազոտություն չկա, չկա նաեւ սոցիալական էֆեկտը»,- հայտարարեց Արշակ Գասպարյանը:

Նա հույս ունի, որ այս փաստաթուղթը նախորդ իշխանության փաստաթուղթ է ու այս իշխանությունն այս կարճ ժամանակահատվածում չէր կարող այսպես խառնել ամենը: Հումորով նկատում է. «Հայաստանում իրավիճակ փոխվեց, արդարադատության նախարարությունում միայն Արտակ Զեյնալյանը փոխվեց»: Ինքը գտնում է, որ նոր իշխանության օրոք գոնե ՀԿ-ների հետ համագործակցության փիլիսոփայությունը պետք է փոխվի`ձեւականից իրական դաշտ բերելով այն:

Արշակ Գասպարյանը բացառում է այս փաստաթղթի, այս ձեւով ընդունումը, ուստի, առաջարկում է, որ տոներից հետո դիտորդական խմբի, ոլորտի հ/կ-ների հետ նախարարությունը պետք է նախաձեռնի քննարկումների շարք եւ խումբ-խումբ պետք է քննարկվեն վիճահարույց հարցերը: «Իրականում, ոչ թե ձեւական»,- ասաց բանախոսը` հավելելով. «Մեզ պետք է պատիժների համակարգի նոր մոտեցում»:

ՀՔԱ Վանաձորի գրասենյակի ղեկավար Արթուր Սաքունցը նույնպես տարակուսած է, քանի որ փաստաթղթում, իր գնահատմամբ, բացարձակապես գնահատական չկա`ոչ բարեփոխումների միջազգային միտումների, ոչ էլ ՀՀ արդարադատության նախարարության առաջնահերթությունների համատեքստում: «Սա ուղղակի խոստովանություն է, որ համակարգում կոռուպցիան պետք է լինի եւ դուք էլ ուսումնասիրեք: Բայց անցած յոթ ամիսներին նախարարությունը պետք է ուսումնասիրած լիներ եւ ռազմավարության մեջ արդեն կոնկրետ գործողություններ գրեր: Սա փաստաթուղթ է անպատասխանատվության մասին. ո՞վ է լինելու այս փաստաթղթի պատասխանատուն»,- իր վրդովմունքը բարձրաձայնեց Արթուր Սաքունցը:

Ինքն ակնկալում է բարեփոխումների հնգամյա ժամկետ, քանզի տրամաբանական է, որ տվյալ կառավարությունն իր գործունեության ժամկետի համար ծրագիր ներկայացնի. «Բայց այս ռազմավարությունը չափելի չէ ոչ ժամանակի, ոչ էլ գործողությունների տեսանկյունից: Չորս տարի նախատեսված է բռալյան այբուբենի տեղադրում. աբսուրդ է, դա կոնկրետ եւ կարճ ժամանակ պահանջող խնդիր է: Աբսուրդ վիճակում պիտի հայտնվենք, որ այս փաստաթղթի վերաբերյալ առաջարկ ներկայացնենք: Տպավորություն է, որ դարակներում եղել է, հանել են`ցույց տալու համար իբր գործ է արվում: Այսպես չեն աշխատում: Եվ ի վերջո, ինչքա՞ն արժե այս ծրագիրը: Սրանք բոլորը նախորդ իշխանության «հիվանդություններն» էին, որոնք փոխանցվել են»: Արթուր Սաքունցը այդ ռազմավարության ուսումնասիրությունից չի հասկացել նաեւ, թե դրա նպատակը ո՞րն է` համակարգը արդիականացնել, թե՞ պատժողականից անցնել սոցիալական քաղաքականություն: Նաեւ ասում է, որ տրամաբանության տեսանկյունից միմյանց հակասող դրույթներ կան: Օրինակ, փաստաթղթի կետերից մեկով նախատեսվում է ՔԿՀ-ների անվտանգության ամրապնդում: Ինքը տարակուսած է, քանի որ ստացվում է, պետությունը ելնում է նրանից, որ այնտեղ հանցագործներ են եւ այդ հարթությունում է կառուցում ամենը: Ինքը համոզված է, որ խնդիրը պետք է բերել այն հարթություն, որ այնտեղ մարդիկ են, ովքեր սխալվել են:

«Տպավորություն է, որ մարդիկ պարապ էին մնացել, դուրս եկան հեղափոխություն արեցին եւ նախորդ իշխանության ժամանակ ինչ մոտեցում եղել է`շարունակում ենք: Չեմ ասում զրոյականացնել եղածը, բայց կուտակվել են տվյալներ, փորձ, գիտելիքներ, որոնք չեն օգտագործվել ու այդ պատճառով էր, որ հեղափոխություն եղավ: Բայց հարցերը լուծում են պահանջում: Համակարգին եւ այնտեղ գտնվող մարդկանց պետք է հարգանքով վերաբերվել»,- ասաց բանախոսը` հընթացս մի հետաքրքիր դեպք հիշելով. թավշյա հեղափոխության օրերին, ՔԿՀ-ներում սնունդն էապես լավացրել էին, որ բունտ չհասունանար: Քաղաքական մոտեցման հարցեր կան, որոնք նույնպես չեն երեւում փաստաթղթում: Օրինակ, ոլորտի շատ մասնագետների կարծիքով, ՔԿՀ-ների վարչության պետը պետք է նշանակվի նախարարի կողմից, ոչ թե նախագահի, ինչը նրան նախարարին հավասար իրավունքներ էր տալիս: «Ես զարմանում եմ, ինչո՞ւ է պարոն Զեյնալյանը մոռանում, չէ՞ որ այս հարցերը միասին ենք բարձրացրել: Այլ հարց, որ այս իշխանությունն ասի`ոլորտում բան չեմ փոխում, շարունակում եմ նախորդի քաղաքականությունը: Այս փաստաթղթից երեւում է որ այդպես է»: 

aravot.am