Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Այսօր հայտնի դարձավ, որ Պետական վերահսկողական ծառայության ղեկավարի ժամանակավոր պաշտոնակատար Արգիշտի Քյարամյանը, ով երեկ նշանակվել էր Քննչական կոմիտեի նախագահի տեղակալ, ազատվել է պաշտոնից և նշանակվել ԱԱԾ տնօրենի տեղակալ։

Իրավապաշտպան Արթուր Սաքունցը ArmDaily.am-ի հետ զրույցում ասաց, որ իրապես ոչինչ չի հասկանում, ոչ շարժառիթ, ոչ դրդապատճառ, ոչ նպատակ նման քայլերի։

«Քանի որ այդ ամբողջը գտնվում է իռացիոնալ տիրույթում՝ կարող եմ միայն ասել՝ անքննելի են Աստծո գործերը։ Ակամայից առաջ է գալիս տպավորություն, որ կարծես «կլաս» ենք խաղում, կհիշեք՝ մանկական խաղ կա, թռչկոտելով «կլաս» են խաղում, այս դեպքում՝ տեղից տեղ թռցնելով։ Իսկ եթե լուրջ՝ այս ամենը վկայում է, որ համակարգային փոփոխությունների կատարման գիտակցումը բացակայում է, որի հետևանքով նույն այդ չփոփոխված համակարգերի պարագայում ստիպված ես օգտագործել նույն գործիքները, որոնք ժամանակին կիրառվել են։ Այսինքն, եթե անգամ քաղաքական որոշում կա՝ այդ քաղաքական որոշումը իրականացվում է այնպիսի իրավական կարգավորումներով, որոնք վաղուց պետք է փոխված լինեին»։

Սաքունցն ընդգծեց, որ չկա որևէ տվյալ, թե Քյարամյանն, ի վերջո, լավ աշխատեց, արդյունավետ աշխատեց, թե վատ աշխատեց։

«Այսինքն՝ այդ ի՞նչ սիրուն աչքերի համար ինքը միանգամից տեղափոխվեց Քննչականի պետի տեղակալ, հետո միանգամից էլ ԱԱԾ պետի տեղակալ, այդ ի՞նչ ծառայությունների համար, ի՞նչ որակների համար, երբ այդ ամենի մասին տեղեկություն չկա, դրա համար էլ ակամայից գալիս է արտահայտությունը, որ անքննելի են Աստծո գործերը։ Հանրության համար շարունակում են մնալ անհասկանալի, անչափելի կադրային նշանակումները և ազատումները։ Դա այն ճանապարհը չէ, որ կարող է բերել պետական կառավարման և պետական ինստիտուտների նկատմամբ հանրային վստահության բարձրացմանը, որը ավելի կարևոր և կենսական նշանակություն ունի մեր զարգացումների համար»,-ասաց Սաքունցը։

armdaily.am