Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Ի՞նչ եղավ Փաշինյանի իշխանության օրոք հիմնադրված ու լուծարված ԱՆԻՖ-ի քրեական գործը, ի՞նչ են եղել պետական բյուջեից այս ֆոնդին փոխանցված միլիարդները. մոտ երկու տարի է՝ իրավապահները քննում են քրեական գործը, և ոչ մի մեղադրյալ, կասկածյալ ու ձերբակալված անձ:

«Քննությունը կամ առաջ չի գնում՝ դրա մասին որևէ տեղեկություն չկա, իսկ խոսքը վերաբերում է բավական հնչեղություն ունեցող կոռուպցիոն հանցագործություններին», - «Ազատության» հետ զրույցում ասաց իրավապաշտպան Արթուր Սաքունցը:

Այսօր էլ Քննչականից «Ազատությանը» փոխանցեցին՝ նոր զարգացում չկա: Արդյոք պաշտոնյաներին, ԱՆԻՖ-ի տնօրենին, խորհրդի նախկին նախագահ, նախկին փոխվարչապետ Տիգրան Ավինյանին հարցաքննել են, ո՛չ Քննչականից են հստակ պատասխանում, ո՛չ էլ Ավինյանն է արձագանքել «Ազատության» հարցին:

Մինչև Երևանի քաղաքապետի պաշտոնին հասնելը արդյոք ԱՆԻՖ-ի գլխավոր համակարգողի բարեվարքությունը ուսումնասիրել են. Հակակոռուպցիոն քաղաքականության խորհրդի վերջին նիստում, որ վարել է վարչապետ Փաշինյանը, հարցրել է իրավապաշտպան Սաքունցը. «Արդյոք ստուգման է ենթարկվել ԱՆԻՖ հիմնադրամի հետ կապված նախկին փոխվարչապետ, ներկա քաղաքապետի բարեվարքությունը, որի պատասխան հնչել է, որ այո, և 2 տարի առաջ նյութերն ուղարկել են Գլխավոր դատախազություն»:

Իսկ հետո ի՞նչ են եղել այդ նյութերը, արդյոք առնչվում են ԱՆԻՖ-ի գործին, Գլխավոր դատախազությունից «Ազատությանը» դեռ չեն պատասխանել: Փակ նիստից այլ մանրամասներ Սաքունցը չպատմեց: Հնչեղ գործի այս դանդաղ ընթացքը մտահոգիչ է, ասաց իրավապաշտպանը. «Գործ ունենք անգործության հետ նման մակարդակի և ծավալի հանցագործությունը չբացահայտելու հետ կապված»:

Հայաստանի պետական հետաքրքրությունների ֆոնդը պետք է դրսից Հայաստան ներդրումներ բերեր, խթաներ արտահանումը, հայաստանյան բիզնեսներում պետական միջոցներից ներդրումներ աներ ու զարգացներ: ԱՆԻՖ-ի խոշոր ծրագրերից էր «Ազգային ավիաուղիների» նախագիծը: 4.4 միլիարդ դրամի ներդրում արեցին պետական բյուջեից, բայց երկու տարի չանցած տապալվեց Fly Arna-ի թռիչքը: Մեկ ամիս առաջ սնանկ ճանաչվեց ընկերությունը:

Վարչապետի հրապարակային խոստովանությունից, թե ծրագիրը ձախողվել է, մեկ տարի անց էլ բան չի փոխվել: Ովքեր են փոշիացած միլարդների պատասխանատուները՝ հանրությանը հայտնի չէ: Քրեական գործի այս դանդաղ ընթացքը խորացնում է կասկածները, որ կառավարության հիմնադրած ֆոնդի պատմությունը խոշոր կոռուպցիոն դեպք է, կարծում է «Թրանսփարենսի ինթերնեշընըլ» հակակոռուպցիոն կենտրոնի ծրագրերի ղեկավար Վարուժան Հոկտանյանը:

«Ինչքան ձգձգվի այս գործը, այնքան այդ կասկածներն ավելի կառարկայանան որպես դասական մեծ կոռուպցիայի դեպք», - ասաց նա:

Հոկտանյանի տպավորությամբ՝ Փաշինյանի օրոք էլ քրեական գործերի ընթացքը քաղաքական նպատակահարմարությամբ է որոշվում: Նախընտրական փուլերում վարչապետի օրակարգում նախկինների կոռուպցիան է, իսկ յուրայինների գործերը հրատապ ընթացք են ստանում, երբ պետք է, հավելեց Վարուժան Հոկտանյանն ու հիշեցրեց պատգամավոր Հովիկ Աղազարյանի օրինակը:

Վարչապետի հետ փակ հանդիպմանը մասնակցած իրավապաշտպան Սաքունցը այս քրեական գործի ընթացքից եզրահանգում է՝ այստեղ քաղաքական ազդեցություն կա:

Վստահության անթույլատրելի չարաշահում, խայտառակություն. սա էլ վարչապետ Փաշինյանի քաղաքական գնահատականն է ԱՆԻՖ-ի պատմությանը, որ հիմնադրեցին մեծ խանդավառությամբ:

Հնչեղ կոռուպցիոն գործ առանց մեղադրյալների. ԱՆԻՖ-ի պատմությունը երկու տարի քննվում է