Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Իրավապաշտպան Արթուր Սաքունցի կարծիքով էական չէ՝ Ոստիկանությունն է գաղտնալսում քաղաքացիներին, թե Ազգային անվտանգության ծառայությունը (ԱԱԾ), նրա գնահատմամբ՝ օպերատիվ հետախուզական գործունեության մասին օրենքն ի սկզբանե մարդու իրավունքների տեսանկյունից ռիսկային է: Սաքունցն ասում է՝ գործող օրենքը չունի այնպիսի ընթացակարգ, որը հնարավորություն կտա մարդուն իր իրավունքների հնարավոր խախտումները կանխել և բողոք ներկայացնել այդ խախտումների դեպքում:

«Օպերատիվ հետախուզական որևէ միջոցառման մասին տվյալներ, մինչ այժմ, Հայաստանի Հանրապետության որևէ քաղաքացու չեն ծանոթացրել, երբ նրա նկատմամբ որպես կասկածյալ կամ մեղադրյալ ներգրավելու որոշումը կարճվել է, և ըստ օրենքի՝ պետք է նրան ծանոթացնեն նրա նկատմամբ իրականացված օպերատիվ հետախուզական միջոցառումների մասին տեղեկությունը, որպեսզի նա, եթե գնահատում է, որ այդ միջոցառումների իրականացմամբ խախտվել է իր իրավունքը, կարողանա բողոքարկել», - «Ազատության» հետ զրույցում նշեց իրավապաշտպանը:

Ազգային ժողովի «Իմ քայլը» խմբակցության պատգամավոր Արմեն Խաչատրյանի մշակած նախագիծն առաջարկում է փոփոխել այս օրենքը՝ Ազգային անվտանգության ծառայությունից զատ, գաղտնալսելու հնարավորություն տալ նաև Ոստիկանությանը:

Ներկայիս կարգավորումներով՝ գաղտնալսելու համար Ոստիկանությունը միջնորդությամբ դիմում է ԱԱԾ-ին: Նախագծում նշված է՝ «կխնայվի ԱԱԾ-ին դիմելու, տեխնիկական աջակցություն ստանալու և կազմակերպչական հարցերի համար ծախսվող ժամանակը, հատկապես անհետաձգելի դեպքերում կբարձրանա հեռախոսային խոսակցությունների վերահսկում օպերատիվ հետախուզական միջոցառման արդյունավետությունը, ինչը կնպաստի հանցագործությունների առավել արագ և օպերատիվ բացահայտմանը, կերաշխավորվի մարդու անձնական կյանքին միջամտության որոշակիությունը»։

Օրենքի համաձայն՝ քաղաքացիներին գաղտնալսելու համար դատարանի համապատասխան որոշումն է պետք: Այս մասով որևէ փոփոխություն պատգամավորի առաջարկը չի ենթադրում։

Արթուր Սաքունցի կարծիքով՝ Ոստիկանությունը պետք է ունենա գաղտնալսելու հնարավորություն: «Նորից եմ կրկնում՝ խնդիրը ամենևին նրանում չէ, թե քանի մարմին կլինի, կամ քանի մարմին կունենա նման լիազորություն, խնդիրն այն է, թե արդյոք ապահովված է օրենքով մարդու իրավունքների խախտումների կանխումը և նաև իրավունքների վերականգնման արդյունավետ մեխանիզմը: Ասում ենք՝ ոչ, ապահովված չէ, հետևաբար՝ նման փոփոխությունը ինքը կավելացնի անպայման, անխուսափելիորեն կավելացնի մարդու իրավունքների խախտման ռիսկերը», - ընդգծեց իրավապաշտպանը:

azatutyun.am