Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Քանի դեռ էս կառավարությունը, էս իշխանությունը՝ Սերժ Սարգսյանի գլխավորությամբ գոյություն ունի, ՀՀ-ն ունի մեծ ազգային բրենդ՝ կոռուպցիան է, ուրիշ բրենդ ուղղակի մի ման եկեք», - 8 տարի առաջ ընդդիմադիր պատգամավոր Նիկոլ Փաշինյանը, դիմելով վարչապետ Հովիկ Աբրահամյանին, այսպես էր բնութագրել Հայաստանը և քննադատել իշխանության մեջ բիզնեսով զբաղվող պաշտոնյաներին։ Փաշինյանի իշխանության օրոք տասնյակ քրեական գործեր հարուցվեցին նախկին բարձրաստիճան պաշտոնյաների, նրանց թվում՝ Գագիկ Բեգլարյանի դեմ։

Վերջինս տևական ժամանակ հետախուզվում էր, հետո վերադարձավ Հայաստան, մեկ օրով կալանավորվեց և մոտ 100 հազար դոլար գրավի դիմաց ազատ արձակվեց։

Իրավապահների աշխատանքին հետևող իրավապաշտպանները նկատում են՝ Փաշինյանի իշխանության օրոք որևէ նախկին բարձրաստիճան պաշտոնյա դեռ դատարանի որոշմամբ մեղավոր չի ճանաչվել։ Այս դանդաղկոտության պատճառը համակարգը չբարեփոխելու հետևանք է, կարծում է իրավապաշտպան Արթուր Սաքունցը։ Նրա խոսքով՝ հեղափոխությունից հետո նոր իշխանությունը պետք է ազատվեր կոռուպցիայի մեջ թաթախված մանր ու մեծ կադրերից։

«Գլխավոր դատախազության այս վերջին հրապարակումը, որը վերաբերում էր ամենայն հավանականությամբ Երևանի նախկին քաղաքապետ Գագիկ Բեգլարյանի կողմից, դա ուղղակի հերթական օրինակն է, թե ինչպիսի անգործություն է ցուցաբերել նախկին գլխավոր դատախազը {Արթուր Դավթյանը-խմբ.}, չնայած առնվազն 2019-21, 2022 թվական՝ 3 տարվա ընթացքում կարելի էր և ռեսուրսները գտնել, և փոփոխությունները կատարել, և իրավիճակը փոխել», - ասաց նա:

Սաքունցի գնահատմամբ՝ այս իշխանություններն էլ չունեն կոռուպցիայի դեմ պայքարի կամք, ավելին՝ կան նոր հարստացողներ, որոնք կապ ունեն պաշտոնյաների հետ. «Ես կարծում եմ, որ համակարգային այդ խնդիրը, որ իշխանությունը հանդիսանում է հարստության աղբյուր, կամ իշխանության հովանավորություն ունենալը հանդիսանում է բիզնեսում հաջողակ լինելու երաշխիք կամ գրավական, այդ միտումը չի հաղթահարված, որովհետև ակնհայտ գոյություն ունի շահերի բաշխում, այսինքն՝ քիչ չէր, որ կային նախկին շահերի բախման լայնածավալ, զանգվածային դրսևորումները, հիմա էլ ունենք նման դրսևորումներ, իհարկե ոչ այն ծավալով, բայց այնուամենայնիվ, այստեղ լուրջ սկզբունքային դիրքորոշում է պետք»:

Գագիկ Բեգլարյանն անցնում է նաև ապօրինի ծագում ունեցող գույքի բռնագանձման գործով, որը դատարանում է։ 6 տարի Կենտրոն համայնքը, ապա՝ 3 տարի ողջ Երևանը ղեկավարած Բեգլարյանը, որ 5 տարի էլ տրանսպորտի և կապի նախարար է եղել, դատարանում պետք է ապացուցի, որ օրինական ճանապարհով է միլիարդների տեր դարձել։ Հակառակ դեպքում, պետությունը կարող է բռնագանձել ունեցվածքը՝ 3 միլիարդ դրամ, 33 բնակարան Երևանում, տարածքներ, շինություններ, ավտոհանգրվաններ։