Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Վարդաշեն» քրեակատարողական հիմնարկում կորոնավիրուսի նոր դեպքեր չեն արձանագրվել, «Ազատությանը» փոխանցեցին Արդարադատության նախարարությունից:

Երեկ հայտնի էր դարձել պահակակետում աշխատող 5 վարակակիրների մասին, որոնք արդեն մեկուսացված են բուժհաստատություններում: Վարակակիրները դատապարտյալների հետ որևէ որևէ շփում չեն ունեցել, իսկ նրանց հետ շփված 28 անձինք ևս մեկուսացված են:

Նախարարության մամուլի խոսնակ Լուսինե Մարտիրոսյանն «Ազատությանը» փոխանցեց` կանխարգելիչ միջոցառումների մասին նախարարությունը տեղեկացրել էր դեռ մարտի 13-ին:

Ըստ այդ հաղորդագրության` ազատությունից զրկված անձանց շրջանում պարբերաբար անցկացվում է անհրաժեշտ բուժզննում, պարբերական բնույթ են կրում նաև իրազեկման աշխատանքները: Խիստ հսկողություն է սահմանվել հարազատների այցելությունների նկատմամբ:

Իրավապաշտպան Արթուր Սաքունցը, սակայն, կարծում է, որ ձեռնարկված միջոցառումները բավարար չեն.- «Անձնակազմը պետք է անխտիր ապահովված լինի բժշկական պաշտպանության և անհատական պաշտպանության միջոցներով, և դրա մասին ուղղակի մենք տվյալներ, ցավոք, սրտի, ամբողջական չունենք, չնայած գիտենք, որ պատշաճ չէ: Սա մյուս խնդիրն է, և իհարկե պարբերական ախտահանումը, նկատի ունեմ ախտահանող միջոցները, որոնք, իհարկե, մշտապես տրամադրվել են` քլոր կամ մյուս ախտահանող նյութերը, բայց պետք է այստեղ լրացուցիչ ջանքեր գործադրել և միջոցներ հատկացնել»:

Իրավապաշտպանը նկատում է` ռեժիմային հիմնարկներում ավելի խիստ միջոցառումներ պետք է իրականացնել, քանի որ փակ հաստատություններ վիրուսի ներթափանցումից հետո դրա դեմ պայքարը շատ ավելի դժվար կլինի` հաշվի առնելով նաև քրեակատարողական հիմնարկների ծանրաբեռնվածությունը: Սաքունցը կարծում է, որ պետք է դիտարկվի նաև ոչ ծանր հանցագործությամբ դատապարտվածների վաղաժամկետ ազատ արձակման հարցը:

«Խցերում են գտնվում և շատ մեծ խտությամբ, էլ չեմ խոսում` եթե գերբեռնված խցեր են, ապա վիրուսը պարզապես շատ հեշտությամբ կարող է տարածվել, և համավարակը կդառնա ուղղակի արդեն բավական ողբալի»,- նշեց նա:

Ժամեր անց հայտարարություն տարածեցին Գլխավոր դատախազությունից: Դատարանի վարույթում գտնվող ռիսկային խմբի անձանց գործերով դատախազները միջնորդություն կներկայացնեն կալանավորումն այլ խափանման միջոցով փոխարինելու հարցը քննարկելու համար: Նախնական քննարկումներով որոշումը կտարածվի «Դատապարտյալների հիվանդանոց» ՔԿՀ-ում գտնվող և բուժօգնություն ստացող 11 անձանց, ինչպես նաև ՔԿՀ-ներում պահվող թվով 9 անձանց վրա: Նրանցից երկուսը կալանքից արդեն ազատ են արձակվել:

«Առաձնահատուկ նշանակություն է տրվելու այլընտրանքային խափանման միջոցների կիրառման դեպքում ազատության մեջ հայտնվելու դեպքում այդ անձանց հետագա վարքագծի դրսևորման, նրանց ազատության մեջ գտնվելու պայմանների չխախտման նկատմամբ հսկողության իրացմանը»,- շեշտեց գլխավոր դատախազի խորհրդական Գոռ Աբրահամյանը:

Նկատենք, մինչ այդ կային նախադեպեր, երբ դատարանը խափանման միջոց կալանքը փոփոխել էր` հիմք ընդունելով պանդեմիայի փաստը: Դատավոր Արման Հովհաննիսյանը, օրինակ, 2 նախաքննության, մեկ դատաքննության փուլում գտնվող գործերով ազատ արձակելու որոշում էր կայացրել և ի թիվս այլ հանգամանքների հղում էր կատարել եվրոպական կոմիտեի մարտի 20-ին հրապարակած զեկույցին, որում կորոնավիրուսի համավարակի համատեքստում անդրադարձ է կատարված անազատության մեջ գտնվող անձանց։

Ինչ վերաբերում է Իրանի և Իտալիայի օրինակով համաներում իրականացնելուն, օրեր առաջ արդարադատության նախարարը հայտարարեց, որ Հայաստանում վիճակագրությունն այլ է.- «120-150, որոշ երկրներում` 200 տոկոս, իսկ Հայաստանում բեռնվածության ցուցանիշը 43-44-ի շրջակայքում է, այսինքն` մենք չունենք այնպիսի իրավիճակ, որ կրիտիկական վիճակ է, և դիմենք այդպիսի ծայրահեղ միջոցների»:

Հարևան Վրաստանում կալանավայրերում կորոնավիրուսի հնարավոր տարածումը կանխելու նպատակով երկրի Արդարադատության նախարարությունը դիմել է աննախադեպ մի քայլի` իր աշխատակիցների մի մասին դատապարտյալների հետ միասին փակել է քրեակատարողական հիմնարկների տարածքում: