Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Բոլոր 36 համայնքներում ընտրությունները դիտարկած «Անկախ դիտորդի» ներկայացուցիչ Արթուր Սաքունցն ասում է` որոշ համայնքներում կոալիցիաների մի քանի հավանական տարբերակներ կան, և առաջիկա օրերին վերջնականապես հայտնի կլինի, թե մեկ ուժի 50+ ձայներ չլինելու պարագայում ավագանու ինչպիսի դաշինքներ կստեղծվեն. «Որ ավագանին քաղաքապետ ընտրի, պետք է ձայների կեսից ավելին, հիմա 45 տոկոս հավաքած, ենթադրենք մանդատների, չի բավարարելու, 33-ից, ենթադրենք, պետք է 17 ունենա, այն մնացածները, որոնք իրար հետ կազմում են 51 տոկոս, տեսականորեն եթե նրանք կարողանան համաձայնության գալ, 51 տոկոսով 3-4 կուսակցություն կարող է կոալիցիա կազմել, և իրենք իրենց թեկնածուին առաջադրեն իրենց շարքից»:

Ընտրողները սկսել են հավատալ, որ կարող են ազատ արտահայտել իրենց կամքը. Սաքունց

Ըստ Սաքունցի` այս ընտրությունների առանձնահատկություններից է, որ ընտրողները սկսել են հավատալ, որ կարող են ազատ արտահայտել իրենց կամքը, և մեծամասշտաբ խախտումներ չեն լինում. «Ոչ բոլոր տեղերում է, դեռ մենք այդ խախտումներն արձանագրել ենք, բայց ընտրողը արդեն ազդեցություն ունի, ընտրողի ձայնը նշանակություն ունի: Սա բազային է: Երկրորդը, որ այնուամենայնիվ, մի կուսակցությունը, որն ազգային մակարդակում իշխում է, ինքն անպայման չի, որ հաղթում է տեղական մակարդակում, որը համատարած բնույթ ուներ, այսինքն` փաստացի մի կուսակցական համակարգից արդեն անցում ենք կատարել բազմակուսակցական համակարգ»:

Դժվար է առաջընթաց արձանագրել մեկ այլ՝ ՏԻՄ ընտրությունների քաղաքականացման ու կուսակցականացման հարցում։ Չնայած ընտրական բարեփոխումներից հետո անհատները չեն կարող մասնակցել ընտրություններին, և պետք է մրցեն դաշինքներն ու կուսակցությունները, այնուամենայնիվ մի քանի համայնքներում հաղթեցին այսպես կոչված` անուն-ազգանուն դաշինքները, որոնք կառուցված էին տվյալ անհատի շուրջ, ինչպես օրինակ` Ապարանում և Վանաձորում։

«Որովհետև դեռևս մենք չունենք ծրագրային պայքար, այլ ունենք անձերի միջև պայքար: Այ սա է ամբողջ խնդիրը, բայց դրա զարգացման համար էլ գործընթացը սկսված է», - նշեց նա:

Չնայած շատ համայնքներում կրկին անհատների և ոչ կուսակցությունների շուրջ ընթացած պայքարին՝ Սաքունցն անցումը համամասնական ընտրակարգին տեղին է համարում և կարծում է` այսպես ուշ թե շուտ ընտրություններն ի վերջո ամբողջովին քաղաքական կդառնան։

«Չունենալով նախորդած ժամանակահատվածում այդ քաղաքական ինստիտուտների, կուսակցությունների տեղերում ձևավորման համար նպաստավոր նման մեխանիզմը, պարզ է, որ խոշորացումից հետո միանգամից առաջին ընտրություններով քաղաքականացման մասին դժվար է խոսել», - շեշտեց «Անկախ դիտորդի» ներկայացուցիչը:

Այս ընտրությունների արդյունքում դիտորդների հաջորդ բացահայտումն այն է, որ Սաքունցի ձևակերպմամբ` «դեռ չի լուծվել քաղաքականության ապաքրեականացման խնդիրը». «Քրեական ենթամշակույթի կրողները, ենթադրենք, քաղաքական արենայում երբ հանդես են գալիս դաշտում, դեռևս տարանջատված չէ: Աբովյան համայնքում, օրինակ, չէ՞, մի քանի քրեական գործերով գնում էր, ընդհանրապես իր բառապաշարով և այլն»:

Հաջորդ օրինակը Մասիսից է, այնտեղ ընտրված Դավիթ Համբարձումյանը հիմա էլ անցնում է քրեական գործով, մեղադրվում է 2018-ին զանգվածային անկարգություններ կազմակերպելու ու դրանց մասնակցելու հոդվածներով, գործը դատարանում է։