Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Ընդհանրական, ոչ հստակ ձևակերպումներով ռազմավարություն, որից հասկանալի չէ, թե ինչ է լինելու տասնամյակներ շարունակ Մարդու իրավունքների եվրոպական դատարանում ընդդեմ Հայաստանի վճիռների պատճառ դարձած դատավորների հետ, ասում է իրավապաշտպան Արթուր Սաքունցը, որն ուսումնասիրել է երեկ Կառավարության ընդունած դատաիրավական համակարգի հնգամյա ռազմավարությունը։

Նրա խոսքով՝ իշխանության մշակած փաստաթղթում, որի նպատակը անկախ դատական համակարգի կայացումն է, չկա բարեվարքության հստակ հայեցակարգ, նշվում է միայն, որ դատավորները պետք է ստուգում անցնեն, իսկ թե ինչ կա դրա հիմքում, նշված չէ։

«Այսինքն, ըստ էության ամրագրվել է, որ Հայաստանի Հանրապետության դատարանը խախտել է մարդու իրավունքը ոչ թե օրենսդրական թերության հետևանքով, այլ՝ գիտակցաբար, ապա նման դատավորներից պետք է ազատվել: Բայց հիմա, այստեղ՝ բարեվարքության կոնտեքստում դա մտնում է արդյոք, թե՝ ոչ, մեզ համար հայտնի չէ», - «Ազատության» հետ զրույցում նշեց Սաքունցը:

Երեկ Կառավարության նիստում ներկայացնելով ռազմավարությունը՝ Արդարադատության նախարարն ընդգծել էր, որ հնարավոր է չսպասեն մինչև 2026-ի ավարտը և ավելի շուտ իրագործեն բոլոր գործողությունները, որոնցից թերևս ամենաէականը դատավորների, քննիչների, դատախազների բարեվարքությունն է։ Այժմ նման ստուգում անցնում են միայն նոր նշանակված դատավորները:

«Այս ռազմավարությամբ ընդգծում ենք, որ ոչ միայն դատական համակարգ և դատաիրավական համակարգ նոր մուտք գործող անձանց՝ դատավորների, դատախազների, և այլն, բարեվարքությունը պիտի ստուգվի, այլ նաև գործողներինը: Ուզում եմ հիշեցնել, որ քաղաքական մակարդակում էդ որոշումը արդե՛ն ընդունված է, և ավելին՝ ես նկատի ունեմ՝ մենք, որպես քաղաքական իշխանություն, առաջինը մեր վրա ենք կիրառել էդ սկզբունքը և հիմա արդեն կիրառում ենք քաղաքական իշխանությունը և իշխանության մյուս մարմինների վրա», - Կառավարության երեկվա նիստի ժամանակ հայտարարեց վարչապետը:

Սաքունցը, սակայն, ընդգծում է՝ այս փաստաթղթում պետք է ամրագրվեն իշխանությունների հայտարարությունները։ Դեռ 2019 թվականին վարչապետ Փաշինյանն էր հայտարարել՝ Մարդու իրավունքների եվրոպական դատարանի որոշումներով հաստատված՝ քաղաքացիների իրավունքների կոպիտ խախտումներով դատավճիռների հեղինակ բոլոր դատավորները պետք է հրաժարական տան, հեռանան կամ հեռացվեն պաշտոններից: Սաքունցի խոսքով՝ կարևորագույն այս փաստաթղթում խոսք չկա իշխանության զավթման մասին, որին ուղիղ մասնակցություն են ունեցել շատ դատավորներ:

«Եթե դու չես ելնում այն փաստից, որ Հայաստանի Հանրապետությունը զավթված է եղել առնվազն 20-25 տարի, ընդ որում՝ պետության զավթման ամենից կարևորագույն ինստիտուտը դատարանն է, և որ դատարանը իրապես գործադիր իշխանության հսկողության տակ է գտնվել, չէ՞, եթե դու սա չես ամրագրում որպես ելակետային դրույթ, որևէ ռազմավարություն ամբողջական և արդյունավետ լինել չի կարող», - ընդգծեց իրավապաշտպանը:

azatutyun.am