(Armenian) Իրավապաշտպանները հարցեր են բարձրացնում «Զվարթնոց»-ում տեղի ունեցած միջադեպի վերաբերյալ
Ռուսաստանի անվտանգության դաշնային ծառայության սահմանապահ ծառայողները «Զվարթնոց» օդանավակայանում անօրինական են ծառայություն իրականացնում, պնդում է «Իրազեկ քաղաքացիների միավորում» հասարակական կազմակերպության ղեկավար Դանիել Իոաննիսյանը՝ մատնանշելով Հայաստանի և Ռուսաստանի միջև 1992 թվականին կնքված պայմանագիրը: Փաստաթղթով ռուս սահմանապահները ծառայություն պետք է իրականացնեն միայն Թուրքիայի և Իրանի հետ սահմաններին։
«92 թվականին ստորագրվեց Հայաստանի և Ռուսաստանի միջև համաձայնագիր՝ Հայաստանում ռուսաստանյան սահմանապահների գործունեության վերաբերյալ, որով ամրագրվեց, որ Թուրքիայի և Իրանի սահմանները պաշտպանելու են Ռուսաստանի սահմանապահները: Պայմանագրում նաև հստակ գրված է, որ այլ գործառույթներ իրականացնելու համար սահմանապահները չեն կարող ներգրավվել», - մեկնաբանում է նա:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը հավելում է․ - «Որևէ հիմնավորում, թե ինչու պետք է «Զվարթոնց» օդանավակայանում սահմանային ծառայություն իրականացվի ՌԴ ՖՍԲ-ի ծառայության կողմից, չկա։ Այդ առումով, եթե դիտարկվի պայմանագրի սահմանադրականությունը, ապա ինքը պետք է ճանաչվի հակասահմանադրական»:
Իրավապաշտպան Արթուր Սաքունցի խոսքով՝ Հայաստանի և Ռուսաստանի միջև կնքված Ռուսաստանի Դաշնության սահմանապահ զորքերի կարգավիճակի վերաբերյալ պայմանագրով ռուս սահմանապահները կարող են ՌԴ անցանկալի անձանց ցուցակը կիրառել նաև Հայաստան մուտք գործող օտարերկրացիների նկատմամբ:
«Փաստորեն Հայաստանի վրա տարածվում է սանկցիոն ցուցակը, որը անցյալ տարվա նոյեմբերի 1-ին Մեդվեդևի հրամանով հաստատված ցուցակ է», - ասում է Դանիել Իոաննիսյանը:
«Իրազեկ քաղաքացիների միավորում» հասարակական կազմակերպության ղեկավարը նման եզրահանգման է եկել օրերս «Զվարթնոց» օդանավակայանում ուկրաինացի պատգամավորի հետ տեղի ունեցած միջադեպից հետո։ Հակակոռուպցիոն միջազգային քննարկմանը մասնակցելու համար մայիսի 1-ի գիշերը Հայաստան ժամանած Ուկրաինայի Գերագույն ռադայի պատգամավոր Մուստաֆա Նայեմին սահմանապահները շուրջ երկուսուկես ժամ թույլ չէին տվել մուտք գործել երկիր: Ուկրաինացի պատգամավորի խոսքով, «Զվարթնոց» օդանավակայանում հայաստանցի սահմանապահները մանրամասնել են, որ ինքը «անցանկալի անձ» է երրորդ երկրի համար, չեն նշել այդ երկրի անվանումը: Պատգամավորը ենթադրում է՝ այդ երրորդ երկիրը Ռուսաստանն է, որի համար անցանկալի անձանց շարքում է ինքը:
Թեև ուկրաինացի պատգամավորը ի վերջո կարողացել է մուտք գործել Հայաստան, միջադեպը, իրավապաշտպան Արթուր Սաքունց կարծիքով, կարող է ազդել ՀՀ-ԵՄ մուտքի վիզայի դյուրացման գործընթացի վրա։
«Որովհետև հենց Եվրոպական միության անդամ երկրների քաղաքացիներ կարող են անցանկալի համարվել Ռուսաստան Դաշնություն մուտք գործելու համար և դա կիրառվի ՀՀ-ի նկատմամբ», - ասում է իրավապաշտպանը:
Հելսինկյան քաղաքացիական ասամբլեայի Վանաձորի գրասենյակն, ի դեպ, կոչ է արել խորհրդարանականներին դիմել Սահմանադրական դատարան ՀՀ-ՌԴ պայմանագրի սահմանադրականությունը ճշտելու համար։ Սաքունցի դիտարկմամբ՝ պայմանագիրը հակասում է Հայաստանի Սահմանադրության առաջին հոդվածին՝ ինքնիշխանության սկզբունքին:
«Ազատությունը» երեկ դիմել է Հայաստանի Ազգային անվտանգության ծառայություն ուկրաինացի պատգամավորի հետ տեղի ունեցած միջադեպի վերաբերյալ՝ մեկնաբանություն ստանալու համար: Գերատեսչությունից դեռ չեն պատասխանել։ Իսկ այսօր էլ Հայաստանում ՌԴ դեսպան Սերգեյ Կոպիրկինը խուսափեց որևէ մեկնաբանություն տալ։
Feedback
Helsinki Citizens Assembly-Vanadzor
(+374) 322 4 22 68
HCA Vanadzors representative office in Yerevan
(+374) 11 24 22 68
