Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Կառավարության նիստի ժամանակ վարչապետը արդարադատության նախարարին հանձնարարեց նախկին բարձրաստիճան պաշտոնյաների դղյակների, ապօրինի շինությունների հետ կապված մտածել, թե ինչ մեխանիզմներ պետք է կիրառել։

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը կարծում է՝ այդ խնդիրների լուծման համար պետք է ուժի մեջ մտնի ապօրինի ճանապարհով ձեռք բերված գույքի վերադարձման օրենքը և կիրառվի:

Սաքունցի խոսքով՝ դա պետք է դատական ակտերով հաստատվի և իրականացվի, դա է ճանապարհը. «Օրենքի ամբողջ տրամաբանությունն այն է, որ եթե կա գույք և այդ գույքի ձեռքբերման օրինականության հետ կապված կա կասկած, ապա հարց է բարձրացվում ներկայացնելու հիմնավորումները: Եվ անկախ սեփականատիրոջ անձից, եթե հիմնավորումներ չեն ներկայացվում գույքի ձեռքբերման օրինականության վերաբերյալ, ապա այն ազգայնացվում է», ասաց իրավապաշտպանը:

Հարցին, թե սա բունտ չի՞ հասունացնի այդ գույքի սեփականատերերի շրջանում, նա պատասխանեց. «Ոչ, ով ուզում է լինի, կապ չունի: Այստեղ չպետք է լինի սելեկտիվ մոտեցում, այլ պետք է լինի օրենքի առջև բոլորի հավասարության սկզբունքը: Դա, իհարկե, միակ ճանապարհը չի, բայց դա շատ կարևոր ճանապարհ է նախկինում համակարգային կոռուպցիայի հետևանքով ձեռք բերված միջոցները պետությանը վերադարձնելու ուղղությամբ: Առանց դրա անպատժելիությունը չի կարելի համարել դադարեցված: Իհարկե, դրան զուգահեռ պետք է նաև պետական գնումների, բյուջետային միջոցների օգտագործման, տիրապետման, կառավարման ընթացակարգերն ավելի հզորացնեն»:

Արթուր Սաքունցը հավելեց, որ նաև այդպիսի անարդարությունների պատճառով էր, որ տեղի ունեցավ հեղափոխությունը. «Այդ հարցերը պետք է լուծվեն: Այստեղ ուշի կամ շուտի խնդիր չկա, միևնույն է՝ լուծվելու են: Ինչքան շուտ ու հիմնավոր լուծվեն, այնքան մեր զարգացման տեմպերն ապահովված կլինեն»:

lragir.am