Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Փաստաբան Նորայր Նորիկյանը դժվարանում է ասել՝ արդյոք կորոնավիրուսի հայտնաբերման վերջին աղմկահարույց դեպքի առիթով կիրառելի կլինի՞ ՀՀ քրեական օրենսգրքի 277-րդ հոդվածը, որը սահմանում է սանիտարահակահամաճարակային կանոնները խախտելու պատիժները:

«Բարդ է ասել, լրացուցիչ ուսումնասիրություն պետք է կատարվի, որ եզրակացություն անենք: Այդ մարդը հո միտումնավոր չի՞ վարակել մարդկանց, հետո ինքը պետք է արդեն տեղյակ լիներ, որ ինքը վիրուսակիր է»,- ընդգծում է փաստաբան Նորայր Նորիկյանը:

Հիշեցնենք՝ մարտի 12-ին հայտնի դարձավ, որ Էջմիածին քաղաքի բնակիչը, Իտալիայից վերադառնալով և կորոնավիրուսին բնորոշ ախտանշաններ ունենալով, չի հայտնել այդ մասին, չի ինքնամեկուսացվել և մասնակցել է տոնական միջոցառման՝ պատճառ դառնալով նաև այլ մարդկանց շրջանում վիրուսի տարածման:

Այս դեպքը բուռն քննարկումների և քննադատությունների առիթ հանդիսացավ, առանց այն էլ խուճապային այս իրավիճակում։ Ֆեյսբուքի օգտատերերից ոմանք պնդում են, որ անկախ նրանից՝ միտումնավոր, թե ոչ միտումնավոր է դա կատարվել, պետք է օրենքով պատիժ սահմանվի:

Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի դիտարկմամբ՝ պետք է հարցը բարձրացնել ստուգողների աշխատանքի առումով.

«Նման իրավիճակում, երբ պետության կողմից միջոցներ են ձեռնարկվում համաճարակային միջոցառումներ իրականացնելու համար, և տեղի է ունեցել այդ շատ ցավալի դեպքը, ես ավելի շատ հարցը բարձրացնում եմ ստուգողների, որոնք պետք է իրականացնեին ախտորոշումներ կամ միջոցառումների շրջանակում գործողություններ հայտնաբերելու համար: Էստեղ խնդիրն այն չէ, որ այդ կինը դիտավորությամբ է կամ ունեցել է դիտավորություն տարածելու համար, դա ավելի շատ չիմացության հետևանք է»,- նշում է իրավապաշտպանը՝ հավելելով,- կտեղափոխեի այն հարցերով, ո՞վ է թերացել, որովհետև հիմա պետք է մենք ունենանք երաշխիք, որ էդ թերացած օղակը բացահայտվի, շտկվի, որպեսզի նման դեպքեր չկրկնվեն: Նման դեպքերում պատժիչ գործողություններն ամենևին արդյունավետ չեմ կարող համարել»: 

ՀՀ քրեական օրենսգրքի 277-րդ հոդվածի համաձայն՝

«Սանիտարահակահամաճարակային կանոնները խախտելը, որն անզգուշությամբ առաջացրել է մարդկանց զանգվածային հիվանդացում կամ թունավորում՝պատժվում է տուգանքով՝ նվազագույն աշխատավարձի առավելագույնը երկուհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով, կամ ազատազրկմամբ՝ առավելագույնը երեք տարի ժամկետով:

Նույն արարքը, որն անզգուշությամբ ծանր վնաս է պատճառել մարդու առողջությանը կամ առաջացրել է մարդու մահ՝պատժվում է ազատազրկմամբ՝ առավելագույնը հինգ տարի ժամկետով»:

Անդրադառնալով այս հոդվածին՝ Սաքունցը մեկնաբանում է, որ դա վերաբերում է այն դեպքերին, երբ կա հստակ կանխամտածված գործողություն՝ վարակելու կամ համաճարակին նպաստելու.

«Եթե մարդն ունի առողջական խնդիր կամ հիվանդություն, շատ լավ տեղյակ է, որ որևէ ճանապարհով կարող է փոխանցվել մեկ այլ անձի, ու ինքը դիտավորությամբ թաքցնում է և դիտավորությամբ հիվանդությունը տարածում է՝ վնաս պատճառելով, դա այլ հարց է, տվյալ դեպքում պարզ է՝ հարսանիքի հետ կապված հարց է եղել, ունեցել է բոլորովին այլ միտում, քան, ենթադրենք, համաճարակային»: 

Հիշեցնենք, որ կորոնավիրուսով պայմանավորված՝ ամբողջ աշխարհում աննախադեպ իրավիճակ է ստեղծվել, ԱՄՆ-ն արտակարգ իրավիճակ է հայտարարել, մի շարք երկրներ փակել են սահմանները։ Աշխարհում նոր կորոնավիրուսով վարակվածների թիվը 150.000 է: Վիճակագրության համաձայն՝ արձանագրվել է 5543 մահվան դեպք, առողջացել է 72.572 մարդ: Մարտի 14-ի դրությամբ՝ ամենաբարդ իրավիճակում է գտնվում Իտալիան՝ 17.660 վարակված դեպքերով և 1266 մահով։ 

Հայաստանում այսօրվա դրությամբ արձանագրվել է կորոնավիրուսով վարակվածության 18 դեպք։ Իրավիճակը հսկողության տակ պահելու համար իշխանության տարբեր ներկայացուցիչներ դիմել են բնակչությանը՝ կոչ անելով ամենայն պատասխանատվությամբ մոտենալ ստեղծված իրավիճակին և սահմանափակել շփման դաշտը։ Մարտի 12 -ից դպրոցները, մանկապարտեզները և այլ ուսհաստատությունները փակվել են։ 

Առանձին պատգամավորներ հանդես են եկել սննդի օբյեկտները՝ սրճարանները, ռեստորանները փակելու առաջարկով։

ՀՀ վարչապետ Նիկոլ Փաշինյանը մարտի 13-ին իր Ֆեյսբուքի էջի ուղիղ եթերում, անդրադառնալով նշված դեպքին և հետագա դեպքերի կանխարգելմանը, նշել է, որ քննարկվում են օրենսդրական հնարավոր փոփոխություններ, որ վարակիչ հիվանդություններ ունենալու և համաճարակային իրավիճակի դեպքում ժամանակին բժշկի չդիմելը, չինքնամեկուսացվելը կարող է հանգեցնել որոշակի պատասխանատվության:

medialab.am