Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«Այն, որ Եռաբլուրում ծառայություն իրականացնող ոստիկանների աչքի առաջ ավտոմեքենաներ են թալանվում, համակարգային խնդիրների հետևանք է»,-«Մեդիալաբի» հետ զրույցում նման դիտարկում  է անում իրավապաշտպան Արթուր Սաքունցը: 

«Այսօր Եռաբլուրն է, վաղը մարդու անձնական սեփականության տարածքն է կամ ուրիշ դեպք կարող է լինել»,- հավելում է Սաքունցը:

Հիշեցնենք, որ ապրիլի 2-ին «Եռաբլուր» զինորական պանթեոնին հարող տարածքում, որտեղ ապրիլյան զոհերին հարգանքի տուրք մատուցելու արարողություն էր, երկու ավտոմեքենա էր թալանվել: Մեքենաներից մեկը պատկանում էր ապրիլյան պատերազմում զոհված կապիտան Արմենակ Ուրֆանյանի հարազատներին:

Սոցիալական ցանցերում մարդիկ տարակուսանք էին հայտնել, թե ինչպես են ուժեղացված հսկողություն իրականացնող ոստիկանների «աչքի առաջ» գողություն կատարել: Կան տեսակետներ, որ դա նախկին իշխանությունների ներկայացուցիչների հրահանգով կատարված գողություն է, որպեսզի նոր իշխանություններին «սևացնեն»:

Այս մեկնաբանություններին ի պատասխան Արթուր Սաքունցն ասում է, որ կտրուկ եզրակացություններ չպետք է անել: Ըստ նրա՝ կարող են լինել ենթադրություններ, մարդիկ կարող են քաղաքական ենթատեքստ տեսնել այդ ամենում, բայց առանց հիմքերի չպետք է նման եզրակացություններ անել:

«Առանց հիմքերի ինչպե՞ս կարելի է վարկածներ առաջ քաշել: Ուղղակի շատ տգեղ երևույթ է, որ այս օրը նման վայրում նման դեպք է գրանցվում: Որևէ կերպ չես կարող արդարացնել գողությունը, իսկ այդ օրվա կատարվածը, անկախ նրանից, թե հրահանգավորված է, թելադրված է, թե նպատակային է արվել, բոլոր դեպքերում շատ անմարդկային է: Բայց որ անպայման պետք է բացահայտվի, հետո նոր գնահատական տրվի՝ դա միանշանակ է»,- ասում է նա:

Նշենք, որ 2018 թվականից Հայաստանում գողությունների թիվը աճել է: Շատ են ահազանգերը բնակարանային ու ավտոմեքենաների հետ կապված գողությունների վերաբերյալ: Գլխավոր դատախազության տեղեկություններով՝ 2017-ի համեմատ 2018-ին Երևանում բնակարանային գողություններն աճել են 81 տոկոսով: Այս տարվա ընթացքում սեփականության դեմ ուղղված հանցագործությունների աճի միտումը պահպանվում է:

Հարցին, թե արդյոք իրավապահների անգործության հետևանքո՞վ են ավելացել նման դեպքերը, թե՞ այլ պատճառներ էլ կան, Արթուր Սաքունցը պատասխանում է, որ գողություններն ընդհանրապես դժվար բացահայտվող հանցագործություններ են, և հանցագործությունների վիճակագրությունը ցույց է տալիս, որ գողության դեպքերը տարիներով չեն բացահայտվում:

«Իրավապահ մարմինների պատասխանատվությունը, բնականաբար, ուղղակի է: Եվ այստեղ հարցը տեղին է, որ իրավապահ մարմինները, ես նկատի չունեմ միայն ոստիկանությունը, լուրջ բարեփոխումների, գործելաոճը արմատական փոխելու կարիք ունեն: Նրանց ղեկավարն է փոխվել, բայց ղեկավարը եղել է նույն համակարգի մարդ: Այսինքն՝ այստեղ աշխատաոճի սկզբունքները, փիլիսոփայությունը չեն փոխվել, տրամաբանությունը չի փոխվել: Իրապես պետք է լուրջ աշխատանքներ տանել փոփոխություններ իրականացնելու համար»,- ասում է նա:

Սաքունցի խոսքով՝ թե՛ օրենսդրական, թե՛ ինստիտուցիոնալ բավական լուրջ աշխատանքներ պետք է կատարվեն:

Իրավապահ մարմինները սեփականության դեմ ուղղված հանցագործությունների աճը հիմնականում պայմանավորում են համաներման գործոնով, որ ազատ արձակվածները նորից հանցագործություն են կատարում: Արթուր Սաքունցն ասում է, որ դա համաներման հետևանք չէ:

«Ավտորիտար կառավարման համակարգերում հանցագործություն միայն կատարում են իշխանությունները, որոնք ընդհանրապես չէին էլ գրանցվում, այլ դա գործելաոճ էր: Ավտորիտար իշխանության պարագայում հանցագործությունների նկատմամբ շատ կոշտ հսկողություն կար, հանցագործությունները կարգավորված էին: Իսկ ազատության պայմաններում, բնականաբար, ազատություն ստանում են նաև մարդիկ, ովքեր ունեն տարբեր խնդիրներ և փորձում են լուծել: Ամբողջ խնդիրն այն է, որ հենց այդ ազատության պայմաններում ոստիկանության գործելաոճում պետք է արմատական փոփոխություն լինի, որ ոչ թե միայն հետևանքներին արձագանքեն, այլև լուրջ կանխարգելիչ աշխատանքներ կատարեն»,- ասում է նա:

Բայց, ըստ իրավապաշտպանի, կանխարգելման աշխատանքները միայն ոստիկանության վրա չպետք է լինեն: Պետք են տնտեսական, սոցիալական, կրթական լուրջ բարեփոխումներ, որպեսզի քաղաքացիների մի մասի էներգիան ուղղվի ոչ թե հանցագործությունների կատարմանը, այլ ստեղծագործ աշխատանքի կատարմանը:

«Այնպես որ, ես այս իրավիճակն ավելի շատ կապում եմ ազատության դրսևորումներից մեկի հետ, որը, սակայն, վատ տարբերակով է դրսևորվում: Ինստիտուտները ազատության պարագայում պետք է նոր գործելաոճին սովորեն: Լուծումները չեն կարող լինել նախկին ձևերով, բայց ազատության պայմաններում նախկին հիվանդություններին, որոնք պայմանավորված են խնդիրներով, պետք է լուծումներ տրվեն»,- հավելում է Սաքունցը:

medialab.am