Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

ՀՀ Ազգային ժողովը մինչ օրս չի արձագանքել ՀՔԱՎ-ի` ԱԺ մի շարք պատգամավորների վարքագծի վերաբերյալ դիմումին։

Դեռևս 2021 թ․ հունվարի 25-28-ին Ստրասբուրգում տեղի ունեցած Եվրոպայի խորհրդի խորհրդարանական վեհաժողովի ձմեռային նստաշրջանի ընթացքում ՀՀ ԱԺ ԲՀԿ խմբակցության պատգամավորներ Միքայել Մելքումյանը և Նաիրա Զոհրաբյանը, որը  նախկինում նաև ՀՀ ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահն էր, հանդես են եկել Ադրբեջանի կողմից Արցախի Հանրապետության նկատմամբ սանձազերծված պատերազմից տուժած ռազմագերիների, անհայտ կորածների և զոհվածների իրավունքներին վերաբերող խնդիրների և դրանց լուծման հարցերի բարձրաձայնման վերաբերյալ ելույթներով։ Զարմանալիորեն, միջազգային հարթակում, որտեղ քննարկվում են մարդու իրավունքների խախտման դեպքերը, ՀՀ ԱԺ պատգամավորները որոշեցին նաև անդրադառնալ Բաց հասարակության հիմնադրամներին, որը աջակցություն է ցուցաբերում մարդու իրավուքների և ժողովրդավարության արժեքների պաշտպանությանը։ Այսպես՝ ԱԺ պատգամավոր Միքայել Մելքումյանը իր ելույթում նշել է․ «Մեր պարտության պատճառներից մեկն էլ այն է, որ սորոսական գաղափարախոսությունը և դրա գործնական իրականացումը հակասության մեջ մտավ և ջարդեց ազգային արժեհամակարգի ողնաշարը մեր երկրում»։ 

Այսպիսով՝ անհիմն զրպարտանքներ կիրառելով՝ իրենց ընդամենը մի քանի րոպեանոց ելույթները օգտագործում են ժողովրդավարական արժեքները ոտնահարելու, դրանց աջակցություն ցուցաբերողներին թիրախավորելու նպատակով՝ հանդես գալով Եվրոպայի խորհրդում այդ կառույցի հիմնական փաստաթղթի՝ Մարդու իրավունքների և հիմնարար ազատությունների եվրոպական կոնվենցիայով սահմանված մարդու իրավունքների և նրանց երաշխավորող միավորումների դեմ։

Բացի դրանից՝ 2021 թվականի հունվարի 22-ին Բարձրագույն դատական խորհրդի անդամի թեկնածուների ընտրության համար հրավիրված նիստում ՀՀ ԱԺ պատգամավոր Թագուհի Թովմասյանը թեկնածու Դավիթ Խաչատուրյանին ուղղված հարցադրման ժամանակ անդրադարձել է «Բաց հասարակության հիմնադրամներին»` ասելով, որ այն ոչ միայն չի նպաստում ժողովրդավարական և իրավական պետության արժեքների իրացմանը, այլև ուղղված է այդ սկզբունքների արժեզրկմանը, ինչը ակնհայտ կեղծիք է ու ապատեղեկատվություն և գիտակցված մանիպուլիացիա։ 

Ելնելով նշված փաստերից և հիմնվելով ՀՀ ԱԺ կանոնակարգ սահմանադրական օրենքի 4-րդ հոդվածի վրա, ըստ որի` պատգամավորը պարտավոր է պահպանել պատգամավորական էթիկայի կանոնները, ՀՔԱՎ-ը 2021 թվականի փետրվարի 1-ին դիմել էր ՀՀ ԱԺ նախագահ Արարատ Միրզոյանին ՝ ՀՀ ԱԺ պատգամավոր Թագուհի Թովմասյանի և փետրվարի 9-ին՝  ՀՀ ԱԺ պատգամավորներ Նաիրա Զոհրաբյանի և Միքայել Մելքումյանի ակնհայտ կեղծիքներով և ապատեղեկատվությամբ մարդու իրավունքների և ժողովրդավարական արժեքների աջակցությամբ հայտնի Հիմնադրամի գործունեության դեմ, որը գործել ու գործում է Հայաստանում բացառապես օրինականության և Սահմանադրության համապատասխան։ Ավելին՝ ՀՀ ԱԺ պատգամավորները նման հայտարարություններով հրապարակավ աջակցում են տարիներ շարունակ, և հատկապես՝ 2018 թ․ հեղափոխությունից հետո մարդու իրավունքների և ժողովրդավարության արժեքների դեմ հանդես եկող ծայրահեղական խմբավորումների անպատիժ և ապօրինի գործողություններին։

Հարկ է նշել, որ ժողովրդավարության և մարդու իրավունքների արժեքները ամրագրված են ոչ միայն  Հայաստանի Հանրապետության կողմից վավերացված Եվրոպայի խորհրդի հիմնական փաստաթղթի՝ Մարդու իրավունքների և հիմնարար ազատությունների պաշտպանության մասին կոնվենցիայում, այլ նաև ՀՀ Սահմանադրության անփոփոխ առաջին հոդվածում։ 

Այսպիսով՝ ՀՀ ԱԺ նշված պատգամավորները իրենց հայտարարություններով ոտնահարում են և միջազգային, և ազգային օրենսդրությամբ սահմանված նորմերն ու սկզբունքները, և նման վարքագիծը անհամատեղելի է ժողովրդավարական պետության ԱԺ պատգամավորի վարքագծի հետ։

Չնայած նրան, որ դիմումները ներկայացվել են դեռևս փետրվար ամսին, սակայն առ այսօր ՀՔԱ Վանաձորի գրասենյակը որևէ արձագանք չի ստացել։ Մինչդեռ Ազգային ժողովի՝ հանձին ԱԺ նախագահ Արարատ Միրզոյանի պարտավորությունն է այսպիսի վարքագծի հետ կապված դիմումների քննարկումը և դրանք Էթիկայի հանձնաժողովի քննությանը հանձնելը։

Այս խախտումներին պատշաճ և ճիշտ ժամանակին չարձագանքելը խոսում է ԱԺ-ի անհետևողական և անսկզբունքային վարքագծի մասին․ ԱԺ անգործությունը և չարձագանքելը խրախուսում է նման պատգամավորների հակաժողովրդավարական և մարդու իրավունքները ոտնահարող անպատասխանատու վարքագիծը, ինչն էլ նպաստում է անհանդուրժող և ծայրահեղական մթնոլորտի ձևավորմանն ու  շարունակականությանը, որը բացասական ազդեցություն է թողնում ոչ միայն պետության ներսում ժողովրդավարական արժեքների պաշտպանության և ժողովրդավարական ինստիտուտների հզորացման գործընթացի վրա, այլ նաև  ժողովրդավարական միջազգային մարմիններում նվազեցնում է պետության ժողովրդավարական իմիջը։

ՀՔԱՎ դիմումները կարող եք տեսնել ԱՅՍՏԵՂ և ԱՅՍՏԵՂ

ՀՀ ԱԺ պատգամավոր Միքայել Մելքումյանի ելույթը կարող եք տեսնել ԱՅՍՏԵՂ