Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

«ՊՈԼԻԳՐԱՖ» ԱԿՈՒՄԲԻ ԳՈՐԾՈՎ 

ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ

Հելսինկյան քաղաքացիական ասամբլեայի Վանաձորի գրասենյակը, շարունակելով հանրությանն իրազեկել 2023թ․ ապրիլի 23-ի լույս 24-ին, ժամը 01-ի սահմաններում «Պոլիգրաֆ» ակումբ ՀՀ ոստիկանության աշխատակիցների ներխուժման և ակումբի աշխատակիցների ու այցելուների նկատմամբ ցուցաբերած ոչ իրավաչափ գործողությունների, մասնավորապես խոշտանգման, մարդկային արժանապատվության նվաստացման, ֆիզիկական ու հոգեբանական բռնության փաստի առթիվ կազմակերպության ձեռնարկած միջոցառումների և դրանց ընթացքի մասին, հայտնում է, որ՝

• 03․05․2023թ․-ին կազմակերպությունը ստացել էր գրություն առ այն, որ ՀՀ գլխավոր դատախազություն 28․04․2023թ․-ին ներկայացված հանցագործության մասին հաղորդումը վերահասցեագրվել է ՀՀ ՔԿ ՀԿԳ քննության գլխավոր վարչության խոշտանգումների և պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչության՝ ՀՀ քրեական դատավարության օրենսգրքով սահմանված քննչական ենթակայության կանոններին համապատասխան քրեական վարույթ նախաձեռնելու հարցը լուծելու համար։  

• Այսօր, հանցագործության մասին հաղորդման ներկայացումից շուրջ մեկ շաբաթ անց ՀՀ Քննչական կոմիտեի հատուկ կարևոր գործերի քննության գլխավոր վարչությունից ստացվել է 02․05․2023թ․ թվագրմամբ արձանագրությունը՝ ՀՀ քրեական օրենսգրքի 441-րդ հոդվածի 2-րդ մասի 1-ին կետին համապատասխանելու նախնական իրավական գնահատմամբ թիվ 69112023 քրեական վարույթը նախաձեռնելու մասին։ 

• Նախաձեռնված քեական վարույթի շրջանակներում Հելսինկյան քաղաքացիական ասամբլեայի Վանաձորի գրասենյակին իրենց իրավունքների և ազատությունների պաշտպանությունը վստահած քաղաքացիները՝ կազմակերպության փաստաբանի անմիջական մասնակցությամբ, դեպքից շուրջ 10 օր անց, արդեն տուժողի կարգավիճակով հարցաքննվել են և մասնակցել դատաբժշկական փորձաքննության։

Ամփոփելով հայտնում ենք, որ Հելսինկյան քաղաքացիական ասամբլեայի Վանաձորի գրասենյակը շարունակելու է ինչպես սույն գործով ոստիկանության աշխատակիցների ոչ իրավաչափ գործողություններից տուժած քաղաքացիների իրավական  պաշտպանության, արդարադատության կայացման և հետագայում մարդու խոշտանգումներից զերծ մնալու բացարձակ իրավունքի կոպիտ ոտնահարման  իսպառ կանխարգելման ուղղությամբ հետևողական գործողությունները, այնպես էլ  սույն գործով ձեռնարկված միջոցառումների և գործի ընթացքի մասին հանրությանը պարբերաբար կիրազեկի մամլո հաղորդագրությունների միջոցով։ 

05․05․2023թ 

Վանաձոր