Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

Ես գտնում եմ, որ մեր մոտ կարող է Վճռաբեկ դատարանի և Սահմանադրական դատարանի որոշ գործառույթներ իրար միացվել և ունենալ Գերագույն դատարան: Այս մասին Shabat.am-ի հետ զրույցում հայտարարեց իրավապաշտպան Արթուր Սաքունցը՝ անդրադառնալով սպասվող սահմանադրական բարեփոխումներին:

«Այսինքն և՛ երկաստիճան դատական համակարգ ունենանք, և՛ սահմանադրականության խնդիրը, և՛ սահմանադրական նորմերի միասնական կիրառման խնդրի լուծումը տրվի Գերագույն դատարանին»,- ասաց Սաքունցը: Իրավապաշտպանի գնահատմամբ՝ մեզ նոր Սահմանադրություն է պետք, որը կապահովի, կերաշխավորի ժողովրդավարական կառավարում. «Ժողովրդավարական կառավարման հիմնական սկզբունքներն են. իշխանության տարանջատում, փոխզսպման սկզբունքի երաշխավորում, դատական իշխանության անկախության երաշխավորում, մարդու իրավունքների պաշտպանության երաշխավորում, պառլամենտական արդյունավետ վերահսկողություն՝ իշխանության նկատմամբ: Իմ թվարկած բոլոր սկզբունքների հետ կապված մեր Սահմանադրությունը չի երաշխավորում», - նկատեց Սաքունցը:

Խոսելով գործադիր իշխանության նկատմամբ խորհրդարանական արդյունավետ վերահսկողության մասին, Սաքունցն ասաց. «Դա պետք է տարածվի ոչ միայն կառավարության գործունեության նկատմամբ, այլ նաև կառավարությանն առընթեր, կամ գործադիր իշխանության լիազորությունների տիրույթում գտնվող պետական մարմինների նկատմամբ. քննչական մարմինների, Ազգային անվտանգության ծառայության, Պետական եկամուտների կոմիտեի: Վարչապետը, կամ կառավարությունը կարող են միանձնյա որոշում կայացնել և զորքերն ուղարկել ՀՀ սահմաններից դուրս՝ միջազգային խաղաղապահ առաքելությանը մասնակցելու, պառլամենտը բացարձակ որևէ մասնակցություն չունի: Պառլամենտական արդյունավետ վերահսկողություն գոյություն չունի, ենթադրենք պետության դեսպանների նշանակման հարցում, դեսպանների կողմից պառլամենտին հաշվետվություն ներկայացնելու հարցում: Չկան հստակ երաշխիքներ հանրաքվեի նշանակության վերաբերյալ, կամ գործադիրից տեղական ինքնակառավարման կախվածությունը բացառելու, կամ դատական իշխանության անկախության երաշխավորման մասով, վերջին հաշվով պառլամենտական մեծամասնությունը կարող է ընտրել Վճռաբեկ դատարանի նախագահ: Կամ պառլամենտական փոքրամանսությունը որոշիչ նշանակություն չունի պետության համար համակարգային նշանակություն ունեցող որոշումների կայացման մեջ»: Անդրադառնալով կառավարման համակարգի փոփոխության մասին խոսակցություննեին Սաքունցը նշեց, որ դա կեղծ խնդիր է համարում: 

«Դա կեղծ խնդիր է, կառավարման ձևով պայմանավորել կառավարման արդյունավետությունը: Ոչ մի Սահմանադրություն Հայաստանում չի երաշխավորել իշանությունների տարանջատման և փոխզսպման սկզբունքը: Կապ չունի Հանրապետության նախագահն է գործադիր իշխանության ղեկավարը, թե վարչապետը, 2015 թվականի Սահմանադրությամբ նախագահին վերապահված 19 լիազորություններից 17-ը փոխանցվել են վարչապետին: Հիմա անունը փոխվել է նախագահականից կամ կիսանախագահականից պառլամենտական կառավարում, բայց գործադիր իշխանության դեկավարի՝ տվյալ դեպքում վարչապետի լիզորություններն 90 %-ով մնացել են նույնը, հիմա ի՞նչ կարևոր է անունը նախագահական է, կիսանախագահական է, թե պառլամենտական, երբ ԱԺ-ի կողմից գործադիր իշխանության լիազորությունների իրականացման վրա վերահսկողություն չկա»,- ասաց նա: Ավելի վաղ հայտնել էինք, որ ՀՀ վարչապետ Նիկոլ Փաշինյանի հունվարի 27-ին ստորագրած որոշման համաձայն հաստատվել է Սահմանադրական բարեփոխումների խորհրդի անհատական կազմը և գործունեության կարգը: Որոշման համաձայն՝ խորհուրդը կնախագահի ՀՀ արդարադատության նախարարը, խորհրդի կազմում ընդգրկված են նաև ՀՀ ԱԺ պետական-իրավական հարցերի մշտական հանձնաժողովի նախագահը, Մարդու իրավունքների պաշտպանը, ԲԴԽ անդամ Վիգեն Քոչարյանը, ԱԺ ՔՊ խմբակցության պատգամավոր Վահագն Հովակիմյանը, արտախորհրդարանական ընդդիմության 2 և Հասարակական կազամակերպություններից 3 ներկայացուցիչ:

Խորհրդի առաջին նիստը կգումարվի խորհրդի ձևավորման պահից՝ 20-օրյա ժամկետում:

shabat.am