Helsinki Citizens’ Assembly-Vanadzor

Sorry, this entry is only available in Armenian. For the sake of viewer convenience, the content is shown below in the alternative language. You may click the link to switch the active language.

ՀՔԱՎ-ն ամփոփել է 2019 թ.-ին պետական մարմիններին ուղղված տեղեկատվական հարցումների արդյունքները

5 տարի է՝ ՀՔԱ Վանաձորի գրասենյակը պետական, տարածքային և տեղական ինքնակառավարման մարմիններին տեղեկատվական հարցումներ է ուղարկում՝ մարդու իրավունքների պաշտպանությունն ավելի արդյունավետ իրականացնելու նպատակով:  Այդ պատասխանները հնարավորություն են տալիս նաև գնահատելու՝ որքանով են այդ մարմինները պահպանում տեղեկություններ տրամադրելու՝ «Տեղեկատվության ազատության մասին» օրենքով սահմանված պահանջները: Այս ուսումնասիրությունը ներկայացնում է պետական և տեղական ինքնակառավարման մարմինների կողմից «Տեղեկատվության ազատության մասին» ՀՀ օրենքի կատարման վիճակը 2019 թ.-ին:

Հավաքագրված տեղեկությունները դասակարգված են հետևյալ խմբերի՝ ժամանակին, ուշացած և չպատասխանված:

Ժամանակին  ստացված են տեղեկատվական հարցումների այն պատասխանները, որոնք կազմակերպությունն ստացել է 12-օրյա ժամկետում՝ հարցումն ուղարկելուց հետո:  

Ուշացած են համարվում օրենքով սահմանված, ինչպես նաև կազմակերպության կողմից ողջամիտ համարվող ժամկետների խախտմամբ ստացված պատասխանները:

Չպատասխանվածներն էլ այն հարցումներն են, որոնց ընդհանրապես պատասխան չի տրվել՝ տեղեկանքը հրապարակելու օրվա դրությամբ։

2019 թ.-ին ՀՔԱ Վանաձորի գրասենյակն ուղարկել է 1151 գրություն, որոնցից 408 հարցումները ուղղված են պետական կառավարման, տարածքային և տեղական ինքնակառավարման մարմիններին: Համեմատության համար նշենք, որ 2018 թ.-ին նույն կառույցներին ուղարկված 1199 գրություններից 397-ն են եղել տեղեկատվական հարցում։

Հիմնականում հարցումներ ուղարկվել են ՀՀ դատախազությանն՝ իր ստորաբաժանումներով (14.67%), պաշտպանության նախարարությանը (11.74%),  սոցիալական և առողջապահական ոլորտներին (10.76%), ոստիկանությանն՝ իր ստորաբաժանումներով (10.27%), տարածքային և տեղական ինքնակառավարման մարմիններին (10.27%)։ Այդ հարցումները կազմել են ընդհանուր հարցումների 47.44%-ը, մինչդեռ 2018թ.-ին ՀՔԱՎ գրասենյակի տեղեկատվական ընդհանուր հարցումների 10% և ավելին բաժին էին ընկել Տարածքային կառավարման և տեղական ինքնակառավարման մարմիններին՝ 29%, Վանաձորի դպրոցներին՝ 22%, ՀՀ դատախազությանն ու դատախազության ստորաբաժանումներին՝ 10%:

ՀՔԱ Վանաձորի գրասենյակի կողմից 2019 թվականին ուղարկված 408 տեղեկատվության հարցումներից 79-ն ուղարկվել են 45 այլ կառույցների, որոնցից ստացված տվյալներն ամփոփելով, ըստ «Տեղեկատվության ազատության մասին» ՀՀ օրենքով սահմանված ժամկետների, սահմանված ժամկետները պահպանել են այդ պետական մարմինների կեսը՝ թվով 22-ը:

Սոցիալական և առողջապահական ոլորտի կառույցները, կրթության և գիտության,  տարածքային կառավարման, արտաքին գործերի նախարարությունները, զինվորական կոմիսարիատները 2018թ.-ին ուղարկված բոլոր հարցումներին պատասխանել են ժամանակին, իսկ 2019թ.-ին համապատասխանաբար՝ 44 հարցումներից 29-ին, 5 հարցումներից 2-ին, 3 հարցումներից 1-ին, 23 հարցումներից 20-ին ժամանակին պատասխանել են, 5 հարցումներից ոչ մեկը ժամանակին պատասխան չի ստացել։

2019թ.-ին առավել մեծ թվով «ժամանակին» պատասխաններ տրամադրել են՝

• ՀՀ ոստիկանությունն՝ իր ստորաբաժանումներով
• Տարածքային և տեղական ինքնակառավարման մարմինները
• Սոցիալական և առողջապահական ոլորտի կառույցները
• ՀՀ զինվորական կոմիսարիատները
• ՀՀ քննչական կոմիտեն
• ՀՀ դպրոցները
• Ազգային անվտանգության ծառայությունը

2018 թ.-ին նույն կարգավիճակի պատասխաններ ամենաշատը տրամադրել են ՀՀ ոստիկանությունն իր ստորաբաժանումներով, ՀՀ դատախազությունը, Վանաձորի  դպրոցներն ու տարածքային և տեղական ինքնակառավարման մարմինները:

2019 թ.-ին ավելի շատ ուշացած և պատասխան չտրամադրած կառույցներն են՝ ՀՀ պաշտպանության նախարարությունը, ՀՀ արդարադատության ոլորտի կառույցներն ու ՀՀ դատախազությունն՝ իր ստորաբաժանումներով: Գրեթե նույնն է եղել պատկերը 2018-ին՝ ներառյալ ՀՀ կրթության և գիտության նախարարությունը:

Ուշագրավ է, որ թե՛ 2018-ին, թե՛ 2019-ին ՀՀ պաշտպանության նախարարությունը եղել է ՀՔԱՎ գրասենյակի հարցումներին ամենաշատ թվով «ուշացած» պատասխաններ տրամադրած կառույցը:  

2019թ.-ին նվազել է չստացված և ուշացած գրությունների տեսակարար կշիռը, փոխարենն աճել է ժամանակին ստացված գրությունների թիվը։

Ամփոփելով՝ ՀՔԱՎ գրասենյակն արձանագրում է, որ 2019 թ.-ին պետական կառույցներին, տարածքային կառավարման և տեղական ինքնակառավարման մարմիններին ուղղված 408 տեղեկատվական հարցումներից «ժամանակին» պատասխան են ստացել 241 հարցում (59,07%), ուշացած՝ 155-ը (37.99%), իսկ 12 հարցման ընդհանրապես չեն պատասխանել (2,94%):

Նույն կառույցներին ուղղված 397 տեղեկատվական հարցումներից  2018 թ.-ին «ժամանակին» ստացվել են 348 հարցման պատասխան (87,65%), ուշացած՝ 41  (10,3%), իսկ 8 հարցման պատասխան չի ստացվել (2,01%):

Տեղեկանքն ամբողջությամբ՝ ԱՅՍՏԵՂ

Ըստ առանձին կառույցների՝ մանրամասն պատկերը՝ ԱՅՍՏԵՂ